فورۋمعا مەملەكەت باسشىلارى استانادان بەينەبايلانىس ارقىلى قاتىسادى.
جيىن قاتىسۋشىلارى كليماتتىڭ وزگەرۋى اۋىل شارۋاشىلىعىنا قالاي اسەر ەتەتىنىن تالقىلايدى، دەپ حابارلايدى Almaty-akshamy.kz
قازاقستان مەن رەسەيدىڭ XIX ءوڭىرارالىق "اۋىل شارۋاشىلىعى – قۋاتتى ەكونوميكانىڭ نەگىزى" ىنتىماقتاستىق فورۋمى جۇمىسىن باستادى.
"شەكارا ماڭى ىنتىماقتاستىعى فورۋمىنىڭ اۋىلشارۋاشىلىق تۋرالى تاقىرىبى كەزدەيسوق تاڭدالعان جوق، ويتكەنى ەكى ەلدىڭ ەكونوميكاسىندا اگرارلىق سالا ماڭىزدى ورىن الادى. فورۋم بارىسىندا تالقىلاناتىن ماسەلەلەردىڭ ءبىرى، ارينە، اۋىل شارۋاشىلىعى سالاسىنا قاتتى اسەر ەتەتىن كليماتتاعى وزگەرىستەر ماسەلەسى. قوستاناي وبلىسىنىڭ اۋماعىندا سوڭعى ەكى جىل قۇرعاقشىلىق بولدى جانە بۇل ەكونوميكانىڭ وسىى سەكتورىنىڭ دامۋىنا قاتتى اسەر ەتتى"، - دەدى قوستاناي وبلىسىنىڭ اكىمى قۇمار اقساقالوۆ.
فورۋم جۇمىسىنا 500-دەن استام ادام، اتاپ ايتقاندا، رەسەي فەدەراسياسىنىڭ 12 وبلىسى جانە قازاقستاننىڭ 8 وبلىسىنىڭ وكىلدەرى قاتىسادى.
"قوستاناي وبلىسى ەلىمىزدەگى ەڭ ءىرى اگرارلىق وڭىرلەردىڭ ءبىرى بولعاندىقتان فورۋم وتكىزۋ ورنى رەتىندە تاڭدالدى"، - دەيدى قازاقستان اۋىل شارۋاشىلىعى مينيسترلىگىنىڭ باسشىسى ايداربەك ساپاروۆ.
پرەزيدەنتتەر قاسىم-جومارت توقايەۆ پەن ۆلاديمير پۋتين XIX ءوڭىرارالىق ىنتىماقتاستىق فورۋمىنىڭ پلەنارلىق وتىرىسىنا قاتىسادى.
فورۋم قوستانايدا ءوتىپ جاتىر، وعان مەملەكەت باسشىلارى استانادان بەينەبايلانىس ارقىلى قاتىسادى. وفلاين پلەنارلىق وتىرىسقا رەسپۋبليكا پرەمەر-مينيسترىنىڭ ورىنباسارى سەرىك جۇمانعارين مەن رەسەي فەدەراسياسى ۇكىمەتى ءتوراعاسىنىڭ ورىنباسارى سەرگەي وۆەرچۋك قاتىسادى. سونداي-اق قازاقستان-رەسەي ىسكەرلىك كەڭەسىنىڭ وتىرىسى جانە پلەنارلىق سەسسيالار وتەدى.
سەسسيا تاقىرىپتارى:
قازىرگى جاعدايدا ازىق-تۇلىك قاۋىپسىزدىگىن قامتاماسىز ەتۋ؛
اگروونەركاسىپ كەشەنىندەگى سيفرلىق تەحنولوگيالار؛
جاستار جانە اۋىل شارۋاشىلىعى: ءبىلىم بەرۋدەگى جاڭا ترەندتەر.
فورۋم قورىتىندىسى بويىنشا كەلىسىمدەردىڭ سەنىمدى پاكەتىنە قول قويىلادى دەپ جوسپارلانعان.