جۇمىس توپتارى كەلىسىم اياسىندا جۇمىس ىستەيدى.
تۇمەن قالاسىندا ترانسشەكارالىق سۋ وبەكتىلەرىن بىرلەسىپ پايدالانۋ مەن قورعاۋ جونىندەگى قازاقستان-رەسەي بىرلەسكەن كوميسسياسىنىڭ 12ء-شى (30-شى) وتىرىسى ءوتىپ جاتىر. بۇل تۋرالى ق ر ەكولوگيا، گەولوگيا جانە تابيعي رەسۋرستار مينيسترلىگىنەن ءمالىم ەتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
قازاقستان مەن رەسەيدى الەمدەگى ەڭ ۇزىن شەكارالاردىڭ ءبىرى عانا ەمەس، جايىق، ەرتىس، ەسىل، توبىل، ەلەك، قيعاش، قاراوزەن جانە سارىوزەن سياقتى ترانسشەكارالىق وزەندەر دە بىرىكتىرىپ جاتىر.
ەكى ەل اراسىنداعى سۋ قاتىناسى 2010 جىلعى 7 قىركۇيەكتەگى «ترانسشەكارالىق سۋ وبەكتىلەرىن بىرلەسىپ پايدالانۋ جانە قورعاۋ تۋرالى» كەلىسىممەن رەتتەلەدى. بىرلەسكەن كوميسسيا جانە اتالعان وزەندەر بويىنشا جۇمىس توپتارى وسى كەلىسىم اياسىندا جۇمىس ىستەيدى.
بىرلەسكەن كوميسسياعا قوس تاراپ تەڭ ءتوراعالىق ەتەدى. قازاقستاننان وكىل – ق ر ەكولوگيا، گەولوگيا جانە تابيعي رەسۋرستار ۆيسە-مينيسترى س.م. مۇقاتايەۆ، رەسەيدەن – رف سۋ رەسۋرستارى فەدەرالدى اگەنتتىگى ءتوراعاسىنىڭ ورىنباسارى ۆ.ا. نيكانوروۆ.
«وتىرىس بارىسىندا بارلىق ترانسشەكارالىق وزەندەر باسسەيندەرى بويىنشا جۇمىس توپتارى باسشىلارىنىڭ ەسەبى تىڭدالادى. تاراپتار اعىمداعى جىلداعى كوكتەمگى سۋ تاسقىنى، سۋ قويمالاردى تولتىرۋ جانە تۇرعىندار مەن ەكونوميكا سالالارىن سۋمەن قامتاماسىز ەتۋ شارتتارى، گيدروتەحنيكا قۇرىلىستارىن كەشەندى پايدالانۋ جانە ەكسپلۋاتاسيالاۋ، ترانسشەكارالىق سۋ وبەكتىلەرىنىڭ سۋ رەسۋرستارىنىڭ لاستانۋى مەن سارقىلۋىنىڭ الدىن الۋ تۋرالى اقپاراتتارمەن الماساتىن بولادى.
ونىمەن ءبىر مەزگىلدە، جايىق وزەنى باسسەينىنىڭ پروبلەمالارىن شەشۋگە، ءىرى ترانسشەكارالىق وزەندەر باسسەيندەرىندە زەرتتەۋ جۇرگىزۋ بويىنشا ىنتىماقتاستىقتى بەلسەندىرۋدىڭ ءبىرىڭعاي جول كارتاسىن ىسكە اسىرۋعا نازار اۋدارىلماق.
ءىس-شاراعا ەكى ەلدىڭ مينيسترلىكتەرىنىڭ، سۋ شارۋاشىلىعى ۇيىمدارىنىڭ، گيدرومەتەورولوگيا قىزمەتتەرىنىڭ، جەرگىلىكتى اتقارۋشى ورگانداردىڭ جانە باسقا دا مەكەمەلەردىڭ وكىلدەرى قاتىسىپ جاتىر»، - دەلىنگەن حابارلامادا.
ەسكە سالساق، كوميسسيا مەن جۇمىس توپتارىنىڭ وتىرىستارى جىلىنا ءبىر رەت ءار مەملەكەت اۋماعىندا كەزەكتەسىپ وتكىزىلەدى.