ولار بىرلەسكەن ءىس-شارالار جوسپارىن ماقۇلدادى.
قازاقستان مەن رەسەي ماماندارى ارنايى كەزدەسىپ، شەگىرتكە زيانكەستەرىنىڭ تارالۋىنا جول بەرمەۋ جونىندە جوسپاردى تالقىلادى، دەپ حابارلايدى Almaty-akshamy.kz.
«قازاقستان رەسپۋبليكاسى جانە رەسەي فەدەراسياسىنىڭ اۋىل شارۋاشىلىعى مينيسترلىكتەرىنىڭ وسىمدىكتەردى قورعاۋ قىزمەتى ماماندارىنىڭ قاتىسۋىمەن ەكى جاقتى كەلىسىمى شەڭبەرىندە شەگىرتكە زيانكەستەرىنە قارسى قورعاۋ ءىس-شارالارىن وتكىزۋ ماسەلەلەرى جونىندەگى حالىقارالىق كەڭەسى ءوتتى»، - دەلىنگەن اشم باسپا ءسوز قىزمەتىنىڭ حابارلاماسىندا.
ءىس-شارا بارىسىندا مەملەكەتتەر اۋماعىندا شەگىرتكە زيانكەستەرىنە قارسى قورعاۋ شارالارىن ۇيىمداستىرۋ، سونداي-اق ولاردىڭ شەكتەس اۋماقتارعا كوشۋىنە جول بەرمەۋ ماقساتىندا ءوزارا ءىس-قيمىل جاساۋ ماسەلەلەرى تالقىلاندى.
كەزدەسۋ قورىتىندىسى بويىنشا، 2022 جىلى قازاقستان مەن رەسەيدىڭ شەكارالاس ايماقتارىندا شەگىرتكە زيانكەستەرىنىڭ تارالۋىنا جول بەرمەۋ جونىندەگى بىرلەسكەن ءىس-شارالار جوسپارى ماقۇلداندى.
سونداي-اق، تاراپتار ەكى مەملەكەتتىڭ شەكارا ماڭى اۋماقتارىنا شەگىرتكە زيانكەستەرىنىڭ تارالۋ وشاقتارىن انىقتاۋ جانە ولاردىڭ كوشۋىنە جول بەرمەۋ ماقساتىندا بىرلەسكەن زەرتتەۋلەر جۇرگىزۋ تۋرالى كەلىسىمگە كەلدى.