ماماندار شەتەلگە جىبەرىلگەن ناۋقاستىڭ جاعدايىن ءجىتى باقىلاۋدا ۇستايدى.
«قازاقستان حالقىنا» قورىنىڭ قۇرىلۋى الەۋمەتتىك مەديسينالىق ساقتاندىرۋ قورىنىڭ جۇمىسى مەن قارجىلىق جاعدايىن جەڭىلدەتكەن جوق. قوردىڭ مەديسينالىق كومەك ساپاسىن مونيتورينگتەۋ دەپارتامەنتىنىڭ ديرەكتورى ءلاززات شومانوۆا ب ا ق وكىلدەرىنىڭ ساۋالىنا وسىلاي جاۋاپ بەردى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«قازاقستان حالقىنا» قورىنىڭ قۇرىلۋى ءبىزدىڭ قارجىلىق جۇكتەمەمىزگە اسەر ەتكەن جوق. ول قوردىڭ ماقساتى باسقا. بىزدە ناۋقاستارعا كورسەتىلەتىن كومەككە جۇمسالاتىن قارجىنىڭ ءبارى جوسپارلانعان. ونىڭ ۇستىنە بىزدە «شەتەلدە ەمدەۋ شارالارىن ۇيىمداستىرۋ جونىندەگى جۇمىس ورگانى» دەيتىن ارنايى ورگان بار. سول ۇيىمداستىرۋشى ورگان ارقىلى ءبىزدىڭ ەلدە كورسەتىلۋى مۇمكىن ەمەس مەديسينالىق كومەكتى ناۋقاستاردىڭ شەتەلدە الۋىنا جاعداي جاسايمىز. ارنايى كوميسسيا بار. ول كوميسسيانى ق ر دەنساۋلىق ساقتاۋ ۆيسە-مينيسترى باسقارادى. سول كوميسسيا ماقۇلداسا، ەمدەۋگە جىبەرەمىز. ياعني، «قازاقستان حالقىنا» قورىنا قاتىسى جوق وسىنداي كومەك ءتۇرى بار»، - دەدى ول ورتالىق كوممۋنيكاسيالار قىزمەتىندە.
ماماننىڭ ايتۋىنا قاراعاندا، قوردىڭ ساراپشىلارى شەتەلگە جىبەرىلگەن ناۋقاستىڭ جاعدايىن ءجىتى باقىلاۋدا ۇستايدى.
«شەتەلدە ەمدەلۋگە جىبەرگەن كەزدە 100 پايىز اقىسىن اۋدارا سالمايمىز. باسىندا 70 پايىزىن اۋدارساق، ناۋقاس ەلگە قايتار كەزدە ساراپشىلار شەتەلدىك ارىپتەستەرىنىڭ قورىتىندىسىن قارايدى. سول قورىتىندى بويىنشا تولىق ەم جۇرگىزىلگەنىنە كوز جەتكىزىپ قانا شەتەلدىك ۇيىمعا قالعان اقشانى اۋدارامىز. بۇل كومەككە سىرقاتىن بىزدە ەمدەۋگە كەلمەيتىن، جوعارى بىلىكتىلىكتى قاجەت ەتەتىن ناۋقاستار جىبەرىلەدى. كوبىنەسە تىندەر مەن اعازالاردىڭ دونورىن قاجەت ەتەتىن ناۋقاستار جىبەرىلەدى. ويتكەنى ءبىزدىڭ مەنتاليتەت مارقۇمداردىڭ اعزاسىن دونورلىققا بەرۋدى ءالى دۇرىس تۇسىنە بەرمەيدى. رادياسيالىق ەمدەۋ دەگەن بار. ول بويىنشا بەلارۋس ەلىنە جىبەرەمىز، مىسالى. بۇل كومەك، اسىرەسە، بالالارعا باعىتتالعانىن ايتۋ كەرەك»، - دەدى ءلاززات شومانوۆا.
ايتا كەتەيىك، 13 ساۋىردەگى مالىمەت بويىنشا، "قازاقستان حالقىنا" قورىنا 126 ملرد تەڭگە تۇسكەن.