23 ءساۋىر – دۇنيەجۇزىلىك كىتاپ كۇنى.
الماتىداعى ۇلتتىق كىتاپحانادا «كىتاپ شوۋ-2022» شاراسى ۇيىمداستىرىلدى. شارا بالالار جىلى اياسىندا ارنايى وتكىزىلىپ وتىر، دەپ حابارلايدى Almaty-akshamy.kz Almaty-tv سىلتەمە جاساپ.
بۇگىن – كىتاپسۇيەر كوپشىلىك ءۇشىن ەرەكشە كۇن. سەبەبى، دۇنيەجۇزىلىك كىتاپ جانە اۆتورلىق قۇقىق كۇنىن الەمنىڭ 100-دەن استام ەلى اتاپ وتەدى. ماقساتى – جازۋشىلار مەن اقىندارعا قۇرمەت كورسەتۋ جانە جاس جەتكىنشەكتەردى كىتاپ وقۋعا باۋلۋ.
«مەرەكە بارىسىندا بىرنەشە ءىس-شارا سيكلى وتەدى. ماسەلەن، زاڭعار جازۋشى مۇحتار اۋەزوۆتىڭ 125 جىلدىعىنا ارنالعان ادەبي كەش. ءازىلحان نۇرشايىقوۆتىڭ «ماحاببات قىزىق مول جىلدار» كىتابىنىڭ كەيىپكەرلەرى تۋرالى بايقاۋدىڭ قورىتىندىسى جاريالانادى»، – دەدى ق ر ۇلتتىق كىتاپحاناسىنىڭ ءبولىم جەتەكشىسى انارگۇل راحيموۆا.
يليا يۋسۋپجانوۆ جاستايىنان كىتاپقا قۇمار بولىپ ءوستى. ءقازىر ءوزى دە كىتاپ جازادى. تاڭداعان باعىتى - زامانۋي ادەبيەت سالاسى. شىعارمالارى قازاقستاننان بولەك، الىس-جاقىن شەتەلدەردە دە اسا تانىمال. بۇگىن ول مەرەكەگە وراي جارىققا شىققان تۋىندىلارىنان كورمە ۇيىمداستىردى.
«بۇگىنگى شارادا مەن ءوزىمنىڭ 4 كىتابىمدى تانىستىرامىن. ونىڭ ءبىرى «جيزن مويمي گلازامي» دەپ اتالادى. بۇل – ءوزىم ءۇشىن ەرەكشە شىعارما. سەبەبى، كىتاپتى جازۋعا كوپ ۋاقىت جۇمسادىم. مەنەن بولەك، ءتۇرلى باعىتتاعى جانردا قالام تەربەپ جۇرگەن جاس جازۋشىلار دا ءوز كىتاپتارىن كورمەگە قويدى»، – دەدى جازۋشى يليا يۋسۋپجانوۆ.
ءقازىر جاستار اراسىندا كىتاپقا دەگەن قىزعۋشىلىقتىڭ تومەن ەكەنى جاسىرىن ەمەس. ەڭبەكتەگەن بالادان، ەڭكەيگەن قارتقا دەيىن ءتورتبۇرىشتى تەلەفونعا تەلمىرگەن زاماندا مۇنداي شارالاردى وتكىزۋ اسا ماڭىزدى دەيدى ۇيىمداستىرۋشىلار. مەرەكە قارساڭىندا ۇلتتىق كىتاپحانانىڭ 9 زالىندا وقىرماندار ءۇشىن ءتۇرلى باعىتتا شارالار ءوتتى. ايتا كەتكەن ءجون، جيىن ەرتەڭ دە مەگاپوليستىڭ بارلىق كىتاپحانالارىندا جالعاسادى.