قازاقستان مەن رەسەي اراسىندا اۆتوبۋس قايتا قاتىنايدى

بۇعان دەيىن جول قاتىناسى پاندەمياعا بايلانىستى ۇزىلگەن.

ومبى وبلىسى ۇكىمەتىنىڭ باسپا ءسوز قىزمەتىنىڭ حابارلاۋىنشا، ساۋىردەن باستاپ ومبىدان پاۆلودار، كوكشەتاۋ، پەتروپاۆل جانە كەرى باعىتتا اۆتوبۋس رەيسى قايتا جاندانادى، دەپ حابارلايدى Almaty-akshamy.kz

«ومسكوبلاۆتوترانس» اق قازاقستان رەسپۋبليكاسىنا حالىقارالىق باعىتتارعا قىزمەت كورسەتۋدى قالپىنا كەلتىرەدى. رەيستەر كۇندەلىكتى ورىندالادى.

ومبىدان پاۆلودارعا دەيىن جول ءجۇرۋ قۇنى - 1400 رۋبل نەمەسە 7733 تەڭگە. ومبىدان كوكشەتاۋعا دەيىن جول ءجۇرۋ قۇنى - 953 رۋبل نەمەسە 5264 تەڭگە. ومبىدان پەتروپاۆلعا دەيىن جول ءجۇرۋ قۇنى - 550 رۋبل نەمەسە 3038 تەڭگە.

قازاقستانعا كىرۋ ءۇشىن شەكارادان وتكەن كەزدە 72 ساعاتتان كەشىكتىرمەي بەرىلگەن كوروناۆيرۋسقا تەرىس ناتيجەسى بار انىقتاما ۇسىنۋ قاجەت.

رەسەيدىڭ باس مەملەكەتتىك سانيتارلىق دارىگەرىنىڭ شەشىمىنە سايكەس، ەاەو ەلدەرىنىڭ، ونىڭ ىشىندە قازاقستان رەسپۋبليكاسىنىڭ ازاماتتارى رەسەيگە قۇرلىقتاعى وتكىزۋ پۋنكتتەرى ارقىلى كەلەتىن ازاماتتارعا كوروناۆيرۋستىق تەستىلەۋدەن ءوتىپ، ءتيىستى ساۋالناما تولتىرۋدىڭ قاجەتى جوق.