ديپلوماتيالىق كورپۋس وكىلدەرى تىلدىك دايىندىق ساباقتارىنا قاتىستى.
ەستونيا رەسپۋبليكاسىنىڭ قازاقستان رەسپۋبليكاسىنداعى توتەنشە جانە وكىلەتتى ەلشىسى تووماس تيرس الماتىداعى بىتىمگەرشىلىك دايىندىق ورتالىعىنىڭ جۇمىسىمەن تانىستى، دەپ حابارلايدى Almaty-akshamy.kz ق ر قورعانىس مينيسترلىگىنىڭ باسپا ءسوز قىزمەتىنە سىلتەمە جاساپ.
ورتالىق باستىعى، پولكوۆنيك باۋىرجان نىعمەتۋللين دەلەگاسيا مۇشەلەرىنە مەكەمەنىڭ قۇرىلۋ تاريحى، ولاردىڭ جۇزەگە اسىرىپ جاتقان وقۋ باعدارلامالارى، سونداي-اق بىتىمگەرشىلىك جانە تىلدىك دايىندىق سالاسىنداعى باسىم جوبالار جونىندە ايتىپ بەردى.
ديپلوماتيالىق كورپۋس وكىلدەرى قازاقستان قارۋلى كۇشتەرى بىتىمگەرشىلىك بولىمشەلەرىنىڭ الەۋەتى مەن مۇمكىندىكتەرىن ارتتىرۋ شەڭبەرىندە قارقىندى تۇردە وتكىزىلەتىن تىلدىك دايىندىق ساباقتارىنا قاتىستى.
تووماس تيرس ۇلتتىق مۇددەدە دە، سونداي-اق بۇكىل ورتالىق ازيا ءوڭىرىنىڭ مۇددەسىندە دە بۇل ورتالىقتىڭ اتقاراتىن قىزمەتى ماڭىزدى ەكەنىن تىلگە تيەك ەتتى.