قازاقستان ۇلتتىق وليمپيادالىق كوميتەتىنىڭ پرەزيدەنتى گەنناديي گولوۆكين مەن ق ر تۋريزم جانە سپورت ءمينيسترى ەربول مىرزابوسىنوۆ جۇڭگو حالىق رەسپۋبليكاسىنىڭ (قحر) باس مەملەكەتتىك دەنە شىنىقتىرۋ جانە سپورت باسقارماسىنىڭ ءمينيسترى، جۇڭگو وليمپيادالىق كوميتەتىنىڭ پرەزيدەنتى جانە حالىقارالىق ۋشۋ فەدەراسياسىنىڭ باسشىسى گاو چجيدانمەن كەزدەستى.
كەزدەسۋ حاربين-2025 قىسقى ازيا ويىندارىن ۇيىمداستىرۋ كوميتەتىنىڭ رەسمي قابىلداۋى اياسىندا ءوتتى، دەپ حابارلايدى aqshamnews.kz ۇوك-كە سىلتەمە جاساپ.
تاراپتار ەكى ەل اراسىنداعى سپورتتى دامىتۋ سالاسىنداعى ىنتىماقتاستىق ءۇشىن ءوزارا العىس ءبىلدىرىپ، ونى ودان ءارى نىعايتۋعا نيەتتى ەكەندەرىن مالىمدەدى.
قازاقستاندىق دەلەگاسيا جۇڭگو وكىلدەرىنە قوناقجايلىلىق ءۇشىن ريزاشىلىعىن ءبىلدىرىپ، اشىلۋ راسىمىنە شاقىرعانى جانە ازيا ويىندارىن جوعارى دەڭگەيدە ۇيىمداستىرعانى ءۇشىن العىس ايتتى.
«مۇنداي اۋقىمدى كەشەندى جارىستاردى وتكىزۋ ءاردايىم ۇلكەن جاۋاپكەرشىلىكتى تالاپ ەتەدى. حاربين-2025 قىسقى ازيا ويىندارىنىڭ ۇيىمداستىرۋشىلارىنا قوناقجايلىلىعى مەن ۇيلەسىمدى جۇمىسى ءۇشىن العىسىمىزدى بىلدىرەمىز. ءبىز ويىنداردىڭ باسىنان بەرى وسىندامىز جانە ۇيىمداستىرۋ كوميتەتىنىڭ ءوز مىندەتتەرىن ۇلكەن جاۋاپكەرشىلىكپەن ورىنداپ جاتقانىن كورىپ وتىرمىز. مۇنى لوگيستيكالىق قامتاماسىز ەتۋدەن باستاپ، تەحنيكالىق قولداۋ دەڭگەيى مەن ەرىكتىلەردىڭ ۇيلەسىمدى ارەكەتتەرىنەن انىق بايقاۋعا بولادى»، – دەدى گەنناديي گولوۆكين.
ەسكە سالا كەتەيىك، IX قىسقى ازيا ويىندارى-2025 حاربيندە 7-14 اقپان ارالىعىندا وتۋدە. قازىرگى تاڭدا قازاقستان قۇراماسىنىڭ قورجىنىندا توعىز جۇلدە بار: ءبىر التىن، بەس كۇمىس جانە ءۇش قولا مەدال.