قازاقستاندا 2025 جىلعى 1 قاڭتاردان باستاپ كۇشىنە ەنگەن جاڭا جەڭىلدەتىلگەن ەرەجەلەر بويىنشا مەملەكەتتىك ساتىپ الۋ تۋرالى العاشقى شارتتار جاسالدى.
ولاردى قابىلداۋ جوبالاردى، سونىڭ ىشىندە الەۋمەتتىك ماڭىزى بار جوبالاردى جەدەل ىسكە قوسۋعا جانە ولاردىڭ باعاسىنىڭ كوتەرىلۋ ءقاۋپىن ازايتۋعا مۇمكىندىك بەرەدى. جەڭىمپازدار نەگىزىنەن جەرگىلىكتى كومپانيالار بولادى، بۇل ايماقتاردىڭ بيزنەسى مەن ەكونوميكاسىنا قولداۋ بولىپ سانالادى.
اقمولا وبلىسى زەرەندى اۋىلىندا بالالار مەن جاسوسپىرىمدەر سپورت مەكتەبىنىڭ قۇرىلىسى بويىنشا بايقاۋ ەلىمىزدە العاشقىلاردىڭ ءبىرى بولىپ جاڭا ەرەجەلەر بويىنشا وتكىزىلدى. بيىلعى 8 قاڭتاردا جاريالانىپ، قورىتىندىسى 6 جۇمىس كۇنى ىشىندە شىعارىلدى جانە 16 قاڭتاردا قۇرىلىس سالۋشى جۇمىسقا كىرىستى.
«جوبانىڭ قۇنى 2 ملرد تەڭگەدەن اسادى. مەردىگەر رەيتينگتىك-بالدىق جۇيەنى قولدانا وتىرىپ، جاڭا مەملەكەتتىك ساتىپ الۋلار بويىنشا تاڭدالدى، بۇل كونكۋرس مەرزىمىن ايتارلىقتاي قىسقارتتى. بۇل بىزگە قۇرىلىستى 16 قاڭتاردا باستاپ كەتۋگە مۇمكىندىك بەردى. جوبا جىل سوڭىنا دەيىن اياقتالادى جانە نىسان پايدالانۋعا بەرىلەدى. سونداي-اق ءبىز جۇيەدە قوسىمشا بالل الاتىن جەرگىلىكتى قۇرىلىس سالۋشىلارعا نازار اۋدارامىز، بۇل ولاردىڭ قاتىسۋىن ىنتالاندىرادى»، — دەدى اقمولا وبلىسىنىڭ قۇرىلىس، ساۋلەت جانە قالا قۇرىلىسى باسقارماسى باسشىسىنىڭ مىندەتىن اتقارۋشى ازامات بايقۋانىشيەۆ.
سپورت مەكتەبىنىڭ عيماراتى وتپە جول ارقىلى بىر-بىرىمەن بايلانىسقان ەكى بلوكتان تۇرادى. مۇندا ترەناجەر زالى، حوككەي كورتى جانە باسقا دا جاتتىعۋ الاڭدارى جۇمىس ىستەيتىن بولادى. قۇرىلىس ماتەريالدارىنىڭ 90%-ىن جەرگىلىكتى وندىرىستەن الۋ جوسپارلانۋدا. اۋىلدىق سپورت مەكتەبىنىڭ جالپى قابىلداۋ مۇمكىندىگى – اۋىسىمدا 78 ادام.
جاڭا ەرەجەلەر بويىنشا 330 ادام تۇراتىن باتىس قازاقستان وبلىسىنىڭ جالىن اۋىلىندا سۋ قۇبىرىن سالۋ بويىنشا كونكۋرس وتكىزىلدى. جەڭىلدەتىلگەن جۇيەنىڭ ارقاسىندا ساتىپ الۋ پروسەدۋراسى التى كۇندە جۇرگىزىلدى، بۇل جەرگىلىكتى قۇرىلىس سالۋشىعا جۇمىسقا تەز كىرىسۋگە مۇمكىندىك بەردى. جوبانىڭ قۇنى – 785 ملن تەڭگەدەن استام. سۋ قۇبىرىنىڭ قۇرىلىسى اۋىل تۇرعىندارىن ساپالى اۋىز سۋمەن قامتاماسىز ەتەدى.
سونىمەن قاتار تۇركىستان وبلىسى سارىاعاش قالاسىندا جاڭا بۋىندى دامىتۋ ورتالىعىنىڭ قۇرىلىسى باستالدى. جوبانىڭ قۇنى – 2،7 ملرد تەڭگەدەن استام. مەردىگەر 8 جۇمىس كۇنى ىشىندە رەيتينگتىك-بالدىق جۇيەنى قولدانا وتىرىپ تاڭدالعان جەرگىلىكتى كومپانيالاردىڭ ءبىرى بولدى.
شىمكەنت قالاسىنىڭ بوزارىق شاعىن اۋدانىندا كوپقاباتتى تۇرعىن ۇيلەر سالۋ جوباسى بويىنشا ساتىپ الۋ ءراسىمى 7 جۇمىس كۇنى ىشىندە جۇرگىزىلدى. جوبانىڭ قۇنى – 4،9 ملرد تەڭگەدەن استام.
ۇلىتاۋ وبلىسىنىڭ مىڭادىر ستانساسىندا مەكتەپ سالۋ بويىنشا ساتىپ الۋ ءراسىمى 5 جۇمىس كۇنى ىشىندە جۇرگىزىلدى، مەردىگەر جەرگىلىكتى كومپانيا بولدى. جاڭا مەكتەپ سالۋ وقۋشى ورىندارىنىڭ تاپشىلىعى ماسەلەسىن شەشەدى. قازىرگى جۇمىس ىستەپ تۇرعان مەكتەپتە ورىن سانى جەتكىلىكسىز، سپورت زالى دا جوق. 80 ورىنعا ەسەپتەلگەن ەكى قاباتتى جاڭا مەكتەپتىڭ كابينەتتەرى ساپالى ءبىلىم بەرۋ ۇدەرىسىن قامتاماسىز ەتۋ ءۇشىن زاماناۋي جابدىقتارمەن قامتىلادى.
جاڭا ەرەجەلەرگە سايكەس، وسى جىلدىڭ 10 اقپانىنداعى جاعداي بويىنشا قازاقستاندا 951،38 ملرد تەڭگە سوماسىنا 282 703 شارت جاسالدى. سالىستىرۋ ءۇشىن: وتكەن جىلدىڭ ءتيىستى كەزەڭىندە 223،2 ملرد تەڭگەگە 165 558 شارت جاسالعان.
بەرىلگەن شاعىمداردىڭ سانى وتكەن جىلمەن سالىستىرعاندا 22%-دان استامعا: 1700-دەن 1320-عا دەيىن تومەندەدى.