سۋ رەسۋرستارى جانە يرريگاسيا مينيسترلىگى جۇڭگو حالىق رەسپۋبليكاسى سۋ شارۋاشىلىعى مينيسترلىگىمەن سۋ تاسقىنىمەن كۇرەس باعىتىندا ىنتىماقتاستىق جونىندەگى مەموراندۋمعا قول قويۋدى جوسپارلاپ وتىر.
مينيستر نۇرجان نۇرجىگىتوۆ ۇكىمەت وتىرىسىندا سۋ تاسقىنىنا دايىندىق بارىسى تۋرالى باياندادى، دەپ حابارلايدى aqshamnews.kz Cۋ رەسۋرستارى جانە يرريگاسيا مينيسترلىگىنە سىلتەمە جاساپ.
بۇدان بولەك، ۆەدومستۆو رەسەي فەدەراسياسىمەن سۋ تاسقىنى كەزەڭىندە تاراپتاردىڭ ءىس-قيمىلىن ۇيلەستىرۋ ءۇشىن بارلىق ترانسشەكارالىق سۋ اعىندارى بويىنشا ءبىرىڭعاي جۇمىس توبىن قۇرۋ تۋرالى ۋاعدالاستىققا قول جەتكىزدى.
«تاسقىن سۋدى جيناۋ جانە ءقاۋىپسىز وتكىزۋدى قامتاماسىز ەتۋ ءۇشىن مينيسترلىك 2،6 ملرد تەكشە مەتر سۋ ساقتاي الاتىن 42 جاڭا سۋ قويماسىن سالۋدى، جالپى جوبالىق كولەمى 3،7 ملرد تەكشە مەتر بولاتىن 37 سۋ قويماسى مەن 14،5 مىڭ شاقىرىم يرريگاسيالىق كانالدى رەكونسترۋكسيالاۋدى جوسپارلاپ وتىر. بيىل تۇركىستان وبلىسىندا 2 سۋ قويماسىنىڭ قۇرىلىسى باستالدى. اقتوبە، تۇركىستان جانە باتىس قازاقستان وبلىستارىندا 3 سۋ قويماسى كەشەندى رەكونسترۋكسيادان وتۋدە. سونداي-اق، قازسۋشار فيليالدارى سۋ تاسقىنى كەزىندە ۇلكەن كولەمدە سۋ قابىلداعان 34 گيدروتەحنيكالىق قۇرىلىستى جوندەۋ جۇمىستارىن باستادى. باتىس قازاقستان جانە شىعىس قازاقستان وبلىستارىندا 95 شاقىرىم كانالدى مەحانيكالاندىرىلعان تازالاۋ جۇمىستارى جۇرگىزىلدى»،- دەدى مينيستر نۇرجان نۇرجىگىتوۆ.
ايتا كەتۋ كەرەك، سۋ تاسقىنى جاعدايى تەك جاعىمسىز سالدارعا عانا ەمەس، سونىمەن قاتار سۋ قويمالارىنا ەكونوميكا سالالارىنىڭ قاجەتتىلىكتەرى ءۇشىن پايدالانىلاتىن 12 ملرد تەكشە مەتردەن استام سۋ جيناۋعا مۇمكىندىك بەردى.
مىسالى، ق.ساتبايەۆ اتىنداعى كانال ارقىلى تولتىرىلاتىن استانا سۋ قويماسىنا تاسقىن سۋىن جيناۋ 2 ملرد تەڭگەدەن استام قاراجاتتى ۇنەمدەۋگە مۇمكىندىك بەردى.
سونداي-اق، تاسقىن كوپتەن بەرى تىرشىلىك ءنارى بارماعان جەرلەرگە سۋدى باعىتتاپ، ەكولوگيالىق جاعدايدى جاقسارتۋعا مۇمكىندىك بەردى. مىسالى، باتىس قازاقستان وبلىسىنىڭ قامىس-سامار كولدەرىنە 80 ملن تەكشە مەتر، ۇلىتاۋ وبلىسىنان قىزىلوردا وبلىسىنا 839 ملن تەكشە مەتر سۋ جىبەرىلدى. تاريحتا العاش رەت سارىسۋ وزەنى ارقىلى قىزىلوردا وبلىسىنىڭ كول جۇيەلەرىنە سۋ جەتكىزىلدى.
جىل باسىنان بەرى بالقاش كولىنە 12 ملرد تەكشە مەتر، كاسپيي تەڭىزىنە – 7،4 ملرد تەكشە مەتر سۋ جىبەرىلدى.
2024 جىلعى قىركۇيەك ايىنىڭ باسىنداعى جەدەل دەرەكتەرگە سايكەس، سۋ قويمالارىنان اۋىل شارۋاشىلىعىندا 8،4 ملرد تەكشە مەتر، ونەركاسىپتە 3،7 ملرد تەكشە مەتر سۋ پايدالانىلدى.