الماتى قالاسىندا قازاقستان رەسپۋبليكاسىنىڭ تۇڭعىش قورعانىس ءمينيسترى ساعادات نۇرماعامبەتوۆتى ەسكە الۋ شاراسى ءوتتى. سالتاناتتى جاعدايدا كەڭەس وداعىنىڭ باتىرى، حالىق قاھارمانى، ارميا گەنەرالى ساعادات نۇرماعامبەتوۆتىڭ مەموريالدىق تاقتاسىنا گۇل شوقتارى قويىلدى، دەپ حابارلايدى aqshamnews.kz.
تاۋەلسىز قازاقستاننىڭ تۇڭعىش قورعانىس ءمينيسترىن ەسكە الۋعا ونىڭ قىزى ايسۇلۋ نۇرماعامبەتوۆا، دوستارى، ارىپتەستەرى، قازاقستان رەسپۋبليكاسىنىڭ قارۋلى كۇشتەرىنىڭ ارداگەرلەرى، ساعادات نۇرماعامبەتوۆ اتىنداعى قۇرلىق اسكەرلەرىنىڭ اسكەري ينستيتۋتىنىڭ كۋرسانتتارى، الماتى قالاسى قورعانىس ىستەرى دەپارتامەنتىنىڭ وفيسەرلەرى جانە اسكەري-ينجەنەرلىك راديوەلەكترونيكا جانە بايلانىس ينستيتۋتىنىڭ مەرزىمدى قىزمەتتەگى اسكەري قىزمەتشىلەرى قاتىستى.
«24 قىركۇيەك 2013 جىلى كەڭەس وداعىنىڭ باتىرى، حالىق قاھارمانى، تاۋەلسىز قازاقستاننىڭ تۇڭعىش قورعانىس ءمينيسترى ساعادات نۇرماعامبەتوۆ دۇنيەدەن وزدى. ول وتە ادال، ءادىل جانە اسكەري زيالىلاردىڭ بىرەگەي وكىلى بولدى. قازاقستان ارمياسىنىڭ قالىپتاسۋىندا ونىڭ ەڭبەگى زور»، -دەپ اتاپ ءوتتى «وفيسەرلەر وداعى» قوعامدىق بىرلەستىگىنىڭ ءتوراعاسى، گەنەرال-مايور ماحمۇت تەلەگۋسوۆ.
«ساعادات نۇرماعامبەتوۆتىڭ كاسىبي جانە تۇلعالىق قاسيەتتەرى ەرەكشە بولعانىمەن، ول وتە قاراپايىم، ۇستامدى ادام ەدى. ول كەز كەلگەن ىسىندە ادىلدىك پەن ادالدىق تانىتتى. مۇنداي تۇلعا وزىنە دەگەن قۇرمەتكە لايىق جانە ءبىز ونى ءارقاشان ەستە ساقتايمىز»، — دەدى ول.
گۇل شوقتارىن قويۋ راسىمىنەن كەيىن، اڭىزعا اينالعان گەنەرال تۇرعان ءۇيدىڭ جانىنداعى كوشەدە ساعادات نۇرماعامبەتوۆ اتىنداعى قۇرلىق اسكەرلەرى اسكەري ينستيتۋتىنىڭ كۋرسانتتارى مەن دەسانتتىق-شابۋىلداۋ اسكەرلەرىنىڭ اسكەري قىزمەتشىلەرى سالتاناتتى مارشپەن ءجۇرىپ ءوتتى.
ايتا كەتەيىك، ساعادات نۇرماعامبەتوۆ ەلىمىزدىڭ ۇلتتىق قارۋلى كۇشتەرىن قۇرۋعا وراسان زور ەڭبەك ءسىڭىردى. ونىڭ ەسىمى تاريحتا التىن ارىپتەرمەن جازىلىپ قالاتىنىن انىق. جانە دە قورعانىس سالاسىنداعى ەڭبەكتەرى كوپتەگەن ۇرپاق ءۇشىن مۇرا بولىپ تابىلادى. تاۋەلسىز مەملەكەتتەردىڭ قۇرىلۋ كەزەڭىندە تمد ەلدەرىنىڭ قورعانىس مينيسترلەرى اراسىندا ۇلى وتان سوعىسىنا قاتىسقان جالعىز ادام ساعادات نۇرماعامبەتوۆ ەدى.
ونىڭ ەسىمى ءاربىر قازاقستاندىقتىڭ جۇرەگىندە ماڭگى ساقتالادى. ونىڭ بۇكىل ءومىرى – وتانعا ادال قىزمەت ەتۋ جولى، بۇل ءبىزدىڭ مەملەكەتىمىزدىڭ جانە ارميامىزدىڭ قالىپتاسۋ تاريحى.