تەلەفونمەن تىلدەسۋ بارىسىندا ەكى ەلدىڭ تاۋار تاسىمالى تالقىلاندى
قازاقستان مەن جۇڭگو اراسىنداعى جۇك تاسىمالداۋ ماسەلەلەرى قازاقستان رەسپۋبليكاسى پرەمەر-مينيسترىنىڭ ءبىرىنشى ورىنباسارى ءاليحان سمايىلوۆ پەن جۇڭگو حالىق رەسپۋبليكاسى مەملەكەتتىك كەڭەسى پرەمەر-مينيسترىنىڭ ورىنباسارى حان چجەنمەن تەلەفون ارقىلى سويلەسۋ كەزىندە تالقىلاندى، دەپ حابارلايدى اlmaty-akshamy.kz
اڭگىمە بارىسىندا قازاقستاندىق تاراپ اۆتوموبيل جانە تەمىرجول كولىگىمەن جۇك تاسىمالداۋ كولەمىنىڭ ازايۋىنا بايلانىستى شەكارادا ۇلكەن كولەمدە جۇكتەردىڭ جينالىپ قالعانىنا الاڭداۋشىلىق ءبىلدىردى.
«دوستىق – الاشانكوۋ» شەكارا بەكەتىندە قازاقستاننان قىتايعا وتەتىن پويىزداردىڭ سانى تاۋلىگىنە 16-دان 5-6-عا دەيىن تومەندەدى. شەكارادا 7 مىڭعا جۋىق اۆتوكولىكتىڭ كەزەكتە تۇرىپ قالعانى الاڭداۋشىلىق تۋعىزادى.
پرەمەر-مينيستردىڭ ءبىرىنشى ورىنباسارى ءا.سمايىلوۆ بارلىق جۇك تيەلگەن ۆاگونداردى جۇڭگو تاراپى قابىلداۋعا دايىن ەكەنى ماقۇلدانعانىن اتاپ ءوتتى. ول سونداي-اق تەمىرجول كولىگى سالاسىنداعى حالىقارالىق كەلىسىمدەر اياسىندا تاسىمالداۋ جوسپارىن ماقۇلداعان تاراپ جۇكتى ءوز اۋماعىنا قابىلداۋعا مىندەتتى ەكەنىن ەسكە سالدى.
تاراپتار جاقىن ارادا سانيتارلىق-ەپيدەميولوگيالىق تالاپتاردى ساقتاي وتىرىپ، بىرلەسكەن كۇش-جىگەرمەن بۇل ماسەلەنى شەشۋ ءۇشىن بارلىق مۇمكىن شارالاردى قابىلداۋعا ۋاعدالاستى.
سونداي-اق جۇڭگو تاراپى اۆتوكولىكپەن، ونىڭ ىشىندە «قالجات» وتكىزۋ بەكەتىندە كولىك قوزعالىسىن قالپىنا كەلتىرۋ ارقىلى جۇك تاسىمالىن ۇلعايتۋعا دايىن ەكەندىگىن ءبىلدىردى.
تەلەفونمەن سويلەسۋ سوڭىندا تاراپتار ەكى ەل اراسىنداعى ىنتىماقتاستىق كوميتەتىنىڭ وتىرىسىن وتكىزۋ مۇمكىندىگىن تالقىلادى.
ەستەرىڭىزگە سالا كەتەيىك، كوميتەتتىڭ 10-شى وتىرىسى بيىل قازاقستاندا ءوتۋى ءتيىس. ول ونلاين تۇردە وتەدى دەپ جوسپارلانعان.