ناۋرىزباي قاجى تاعان ۇلى، قمدب ءتوراعاسى، باس ءمۇفتي
اسا قامقور، ەرەكشە مەيرىمدى اللانىڭ اتىمەن باستايمىن!
بۇگىن مەملەكەت باسشىسىنىڭ قاتىسۋىمەن قازاقستان حالىق اسسامبلەياسىنىڭ كەڭەيتىلگەن وتىرىسى ءوتتى. وتىرىستا بىرنەشە جاقسى باياندامالار جاسالدى. سونىڭ ىشىندە انالار كەڭەسىنىڭ مۇشەلەرىنىڭ باياندامالارىن اتاپ ايتقان ءجون. انالار - قازىرگى تاڭدا ءبىزدىڭ قوعامدى تاربيەلەۋشىلەردىڭ ىشىندەگى ەڭ نەگىزگىسى. ادام بالاسى دۇنيە ەسىگىن اشقان كەزدە، "انا" دەگەن مەدرەسەدە وقيدى جانە "انا" دەگەن تاربيەشىنىڭ تاربيەسىن الادى. سوندىقتان قوعامدى تاربيەلەۋدە انانىڭ ءرولى زور. قازىرگى زامانعى وزەكتى تاقىرىپتار بويىنشا وتە تاماشا باياندامالار جاسادى. قازاقستان حالىق اسسامبلەياسىنىڭ وڭىردەگى وكىلدىكتەر اراسىندا انالار مەكتەبىنە ەرەكشە كوڭىل ءبولۋ كەرەكتىگى ايتىلدى. سونىمەن قاتار، بايانداماشىلار تاراپىنان ينتەرنەت جۇيەسىنە قاتىستى ماسەلەلەر دە قوزعالدى. قازىرگى تاڭدا بالالاردىڭ ينتەرنەتكە كوپ ۋاقىتىن جۇمسايتىندىعى تۋرالى پروبلەمالار كوتەرىلدى. سونىڭ الدىن الۋ ءۇشىن بالالاردىڭ تاربيەسىنە ەرەكشە كوڭىل ءبولۋ، ولاردى سپورتقا باۋلۋ جونىندە مەملەكەت باسشىسى تاراپىنان قولداۋ كورسەتىلدى. وسى تۇرعىدا جەرگىلىكتى بيلىك وكىلدەرىنە جۇمىستى جەتىلدىرۋگە ناقتى تاپسىرمالار بەرىلدى. بالالاردىڭ سمارتفونمەن كوپ ۋاقىت وتكىزەتىنىنە بايلانىستى جانە تاعى باسقا ماسەلەلەرمەن مەملەكەت باسشىسى، وڭىرلىك بيلىك وكىلدەرى جانە حالىق بولىپ بىرلەسىپ كۇرەسەتىن بولساق، بۇل جارقىن باستاما بولماق.