ءازىربايجان اۋەندەرى الماتى تورىندە قالىقتادى

جامبىل اتىنداعى فيلارمونيادا ءازىربايجان اۋەندەرىنىڭ كەشى ءوتتى

مەرەكەلىك ءىس-شارادا باۋىرلاس ەلدىڭ حالىق اندەرى ورىندالدى، دەپ حابارلايدى Almaty-akshamy.kz

سونداي-اق كەش بارىسىندا كەڭەستىك جانە زاماناۋي كومپوزيتورلاردىڭ شىعارمالارى ورىندالىپ، ونەرسۇيەر قاۋىمدى وزگەشە كۇيگە بولەدى.

ايتا كەتۋ كەرەك، ەكى ەلدىڭ ورتاق تاريحى سوناۋ تۇركى زامانىنان باستاۋ الادى. ال كاۆكازدىڭ وڭتۇستىك-شىعىسىندا ورنالاسقان ءازىربايجان حالقى بيىل تاۋەلسىزدىگىنىڭ 30 جىلدىعىن اتاپ وتۋدە.   

«بۇگىن ءازىربايجان-قازاق مادەنيەتىن، ولاردىڭ مۋزىكاسىن كورسەتكىمىز كەلەدى. تاۋەلسىزدىگىمىزدى اتاپ وتۋگە جاعداي جاساعان قازاقستاننىڭ مادەنيەت مينيسترلىگىنە العىسىمدى بىلدىرەمىن. ءبىز ءۇشىن بۇل ۇلكەن جەتىستىك»، – دەدى قازاقستانداعى ءازىربايجاندار قاۋىمداستىعىنىڭ باسقارما مۇشەسى گاريپ مامەدوۆ.

فيلارمونيانىڭ كوركىن كەلتىرگەن كەشتە ولجاس سۇلەيمەنوۆ تە بوي كورسەتتى. كونسەرت بارىسىندا بيىل ءوزىنىڭ 85 جىلدىق مەرەيتويىن اتاپ وتەتىن حالىق جازۋشىسىنا ارنالعان تۋىندىنىڭ دا تۇساۋى كەسىلدى. ال قازاق اقىنىنىڭ تۇلعاسى مەن شىعارماشىلىعىنا ارنالعان «Reverie Rewire» ەڭبەگىنىڭ اۆتورى، كومپوزيتور لەيلا رومانوۆا ءىس-شاراعا قاتىسۋ ءۇشىن ارنايى الماتىعا كەلىپتى.  

«باعدارلاما ءبىز ءۇشىن ەرەكشە، سەبەبى بۇگىن ءازىربايجان كومپوزيتورلارىنىڭ تۋىندىلارىن ورىندايمىز. مۋزىكا ارقىلى جاڭا مادەنيەتپەن تانىسقان ۇنايدى. كورەرمەندەر كونسەرتتەن ءلاززات الادى دەگەن ويدامىن»، – دەدى ق ر حالىق ءارتىسى گاۋحار مۋرازبەكوۆا.