بۇگىن قازاقستان رەسپۋبليكاسىنىڭ عىلىم جانە جوعارى ءبىلىم ءمينيسترى ساياسات نۇربەك پەن جۇڭگو حالىق رەسپۋبليكاسى ءبىلىم ءمينيسترىنىڭ ورىنباسارى سۋن ياونىڭ كەزدەسۋى ءوتتى.
كەزدەسۋ بارىسىندا ۋنيۆەرسيتەتارالىق سەرىكتەستىكتى دامىتۋ، ەكى ەل ستۋدەنتتەرىنىڭ اكادەميالىق ءبىلىم الماسۋى، قوس ديپلومدىق جانە بىرلەسكەن ءبىلىم بەرۋ باعدارلامالارىن جۇزەگە اسىرۋ، ۋنيۆەرسيتەت فيليالدارىن اشۋ سياقتى ىنتىماقتاستىقتى ودان ءارى دامىتۋ سىندى ماڭىزدى تاقىرىپتار كوتەرىلدى، دەپ حابارلايدى Almaty-akshamy.kz.
ق ر عىلىم جانە جوعارى ءبىلىم مينيسترلىگىنىڭ مالىمەتىنشە، سونداي-اق، قىتايدىڭ قازاقستانداعى جەتەكشى ۋنيۆەرسيتەتتەرى، ءال-فارابي اتىنداعى قازۇۋ-دە بىرلەسكەن قازاق-قىتاي عىلىمي ورتالىعىن قۇرۋ، جاڭا لۋ-بان سەمينارلارىن اشۋ جانە جۇڭگو تىلىندە وقىتۋشىلار دايارلاۋ ءىسى ناقتىلاندى.
مينيستر ءوز كەزەگىندە قىتايلىق ارىپتەسىنە قازاقستاندىق جوعارى وقۋ ورىندارىمەن تىعىز قارىم-قاتىناس ءۇشىن العىس ءبىلدىردى. سونداي-اق، قازاقستانداعى شەتەلدىك ۋنيۆەرسيتەتتەردىڭ فيليالدارى مەن قىتايداعى تاجىريبە ورتالىقتارىنىڭ اشىلۋىنا جان-جاقتى توقتالدى.
«سوڭعى 1،5 جىلدا جەتەكشى شەتەلدىك ۋنيۆەرسيتەتتەر مەن ورتالىقتاردىڭ، سونىڭ ىشىندە قىتايدىڭ سەرىكتەستىك فيليالدارىن قۇرۋ بويىنشا اۋقىمدى جۇمىستار اتقارىلدى. 2023 جىلدى قورىتىندىلاعان تاماشا جەتىستىكتەردىڭ ءبىرى د.سەرىكبايەۆ اتىنداعى شىعىس قازاقستان تەحنيكالىق ۋنيۆەرسيتەتى بازاسىندا «لۋ-بان سەحىنىڭ» اشىلۋى بولدى. ءبىزدىڭ دوستىعىمىزدىڭ ايقىن دالەلى جىبەك جولى ۋنيۆەرسيتەتتەرىنىڭ اليانسىنا قاتىسۋ بولىپ تابىلادى. قازىرگى ۋاقىتتا 8 قازاقستاندىق جوعارى وقۋ ورنى اليانسقا مۇشە بولسا، كەلەسى جىلى ولاردىڭ سانى ودان ءارى ارتادى. مۇنىڭ ءبارى ءبىزدىڭ مينيسترلىكتىڭ جاڭاشىل باستامالارعا دايىن ەكەنىن كورسەتەدى»، - دەدى س.نۇربەك.
قوس تاراپ كەزدەسۋدە بىرنەشە ۇسىنىستاردى تالقىلاۋعا ورتاعا سالدى. قازاقستان ازاماتتارىنىڭ قحر ۋنيۆەرسيتەتتەرىندە ءبىلىم الۋعا دەگەن جوعارى قىزىعۋشىلىعىن ەسكەرە وتىرىپ، ەكى ەلدەن ستۋدەنتتەردىڭ بالامالى الماسۋىن 100-دەن 150 ورىنعا دەيىن ۇلعايتۋدى، سونداي-اق ءتىل ۇيرەنۋ كۋرستارىنا بولەك ورىندار ءبولىپ، قحر ۋنيۆەرسيتەتتەرىندە وقۋ مۇمكىندىگىن كەڭەيتۋ ماسەلەسى ايتىلدى. جۇڭگو تاراپى بۇل ۇسىنىستاردى قولداۋعا تولىق دايىن ەكەنىن ءبىلدىردى.
سونىمەن قاتار، ساياسات نۇربەك جۇڭگو تاراپىنا ەكىجاقتى فورماتتاعى ىنتىماقتاستىقتى كەڭەيتۋ ماقساتىندا قازاقستان رەسپۋبليكاسى مەن قىتايدىڭ ىنتىماقتاستىق كوميتەتى جانىنان جوعارى ءبىلىم بەرۋ سالاسىنداعى كىشى كوميتەت قۇرۋدى ۇسىندى. بۇل باستاما ەكىجاقتى ءتيىمدى ارەكەتتەردى جەڭىلدەتۋگە باعىتتالعان.
ءوز كەزەگىندە جۇڭگو دەلەگاسياسى قۇرمەت رەتىندە قازاقستاندىق تاراپقا اتالعان مۇمكىندىكتەر ءۇشىن العىس ءبىلدىرىپ، ناقتى ءوزارا ءىس-قيمىل ستراتەگيالارىن دامىتۋ مەن نىعايتۋدى جالعاستىرۋعا نيەتتى ەكەنىن اتاپ ءوتتى.
«جۇڭگو مەن قازاقستان تاتۋ كورشى، ءبىزدىڭ ىنتىماقتاستىعىمىز ودان ءارى نىعايا تۇسەدى. ءبىز ءوز تاراپىمىزدان قازاقستاندىقتارعا قىتايدىڭ جەتەكشى ۋنيۆەرسيتەتتەرىندە ساپالى ءبىلىم الۋ ءۇشىن بارلىق مۇمكىندىكتى بەرۋگە دايىنبىز. ءقازىر ءبىزدىڭ ۋنيۆەرسيتەتتەر قازاقستاندىق ستۋدەنتتەردى باكالاۆر دارەجەسىنە قابىلدايدى، ەندى ماگيسترانتتار مەن دوكتورانتتاردى دايىنداۋ جۇمىسىن كۇشەيتۋدى كوزدەپ وتىرمىز»، - دەدى سۋن ياو.
كەزدەسۋ سوڭىندا مينيستر ۋنيۆەرسيتەتارالىق ىنتىماقتاستىقتى قولدايتىنىن اتاپ ءوتتى. ەكى جاق ىنتىماقتاستىقتى نىعايتۋعا جانە ەكى ەلدىڭ جوعارى ءبىلىمىن دامىتۋ ءۇشىن بولاشاقتا ايانباي كۇش بىرىكتىرۋگە دايىن ەكەندىكتەرىن ءبىلدىردى.