بيىل ەلىمىزدە جاقسىلىقپەن قاتار جان سىزداتقان وقيعا دا از بولعان جوق.
وسى اپاتتاردىڭ كەسىرىنەن جۇزدەن اسا ادام كوز جۇمدى، دەپ حابارلايدى Almaty-akshamy.kz
2023 جىلى ەلىمىزدە ورىن العان ءىرى اپاتتار
جۇرگىزۋشىسىز اۆتوبۋس 5 ادامنىڭ اجالىنا سەبەپ بولدى
8 ساۋىردە شىمكەنت قالاسىندا اۆتوبۋس جۇرگىزۋشىسى ايالداماعا جەتپەي، اۆتوبۋستى توقتاتقان. سودان كەيىن اۆتوبۋستىڭ قول تەجەگىشىن تارتىپ قويماي، ودان ءتۇسىپ، سول جەردەگى ءدامحانانىڭ دارەتحاناسىنا كىرىپ كەتكەن. يەسىز قالعان اۆتوبۋس وزدىگىنەن قوزعالىپ، بايتەرەكوۆ پەن نازاربەكوۆ كوشەسىنىڭ قيىلىسىنداعى قارسى باعىتتاعى باعدارشامنىڭ الدىندا تۇرعان 6 جاياۋ جۇرگىنشىنى قاعىپ كەتكەن. اپات سالدارىنان 5 ادام قازا تاپتى. اۆتوبۋس جۇرگىزۋشىسى ءوز كىناسىن تولىق مويىندادى. سوت جۇرگىزۋشىنى قىلمىستىق كودەكستىڭ 345-بابى 4-بولىگىمەن كىنالى دەپ تانىپ، كولىك جۇرگىزۋ قۇقىعىنان 7 جىلعا، باس بوستاندىعىنان 5 جىلعا ايىردى.
«سەمەي ورمانىنداعى» ءورت
8 ماۋسىمدا «سەمەي ورمانى» اۋماعىندا الاپات ءورت بولىپ، كەسىرىنەن 14 ادام كوز جۇمدى. ءورت اۋماعى 60 مىڭ گەكتاردى شارپىدى. وسىعان بايلانىستى سەمەي قالاسىندا توتەنشە جاعداي جاريالاندى. اباي وڭىرىندە بولعان ەل تاريحىنداعى ەڭ ءىرى ورتكە بايلانىستى توتەنشە جاعدايلار مينيسترلىگىنىڭ باسشىسى يۋريي يلين قىزمەتىنەن بوساتىلىپ، ورنىنا جاڭا مينيستر تاعايىندالدى. اباي وبلىسىنىڭ اكىمى ءوز مىندەتىن دۇرىس اتقارماعانى ءۇشىن سوگىس الدى. پرەزيدەنت قاسىم-جومارت توقايەۆ اباي وبلىسىندا بولىپ، قازا تاپقانداردىڭ وتباسىلارىمەن كەزدەستى. ءورت فاكتىسى بويىنشا قىلمىستىق ءىس قوزعالدى. «سەمەي ورمانى» اۋماعىنداعى قايعىلى وقيعاعا بايلانىستى 12 ماۋسىم ەلىمىزدە ازا تۇتۋ كۇنى بولىپ جاريالاندى.
تۇركىستاندا تىرىدەي ورتەنگەن 9 ادام
شىلدەدە تۇركىستان وبلىسىنىڭ بايدىبەك اۋدانىنداعى ەكپىندى مەن شايان اۋىلدارىنىڭ اراسىنداعى جولدا بولعان جانتۇرشىگەرلىك جول اپاتىنان 10 ادام قازا تاپتى. بايدىبەك اۋدانىندا جوعارى جىلدامدىقپەن كەلە جاتقان ءۇش كولىك سوقتىعىسىپ، 9 ادام تىرىدەي ورتەنىپ كەتكەن. تاعى ءبىر اۋىر جاراقات العان ناۋقاس وتا كەزىندە كوز جۇمدى.14 ادام اۋىر جاراقات الدى. ءىرى جول اپاتى تاڭعى ساعات 09:00-دە بولعان. قوس كولىك قانا سياتىن تار جولدا Nissan جەڭىل كولىگى قارسى باعىتقا شىعىپ، سوزاق اۋدانىنان كەلە جاتقان جولاۋشىلار تولى شاعىن اۆتوبۋسپەن بەتپە-بەت سوعىلعان.
«قازاقستان» شاحتاسىنداعى اپات
17 تامىز كۇنى ساعات 10:05-تە «ارسەلورميتتال تەمىرتاۋ» اق تاۋ-كەن ءوندىرۋ ديرەكسياسىنىڭ «كازاحستانسكايا» شاحتاسىندا D6 كومىر باۋرايىندا كونۆەيەر لەنتاسى ورتەندى. «پۆاسس» رتسش ءۇش بولىمشەسى (15 قىزمەتكەر جانە 5 تەحنيكا) جانە توتەنشە جاعدايلار دەپارتامەنتىنىڭ 8 قىزمەتكەرى مەن 2 تەحنيكاسى جۇمىلدىرىلدى. بۇل كەزدە شاحتاداعى 227 ادامنىڭ 222ء-سى ەۆاكۋاسيالانىپ، 5ء-ى قايتىس بولدى.
اياگوزدەگى 4 بالانىڭ ءولىمى
قازان ايىندا اباي وبلىسى اياگوز قالاسىندا جەكە ۇيلەردىڭ بىرىنەن ءورت شىعىپ، قۇتقارۋشىلار ءتورت بالانىڭ دەنەسىن تاپتى. بالالاردىڭ اكەسى جەدەل جاردەم جۇرگىزۋشىسى بولىپ جۇمىس ىستەيدى. اناسى ءۇي شارۋاسىندا ەكەن. سول كۇنى ءسۇت ساتىپ، دۇكەننەن ازىق-تۇلىك الماقشى بولۋ ءۇشىن ۇيىنەن شىققان. وسى كەزدە ۇيدەن ءورت شىعىپ، 4 بالانىڭ ءومىرىن جالمادى. بالالاردىڭ جاسى 8، 6، 4، 2-دە بولعان.
«كوستەنكو» شاحتاسىنداعى ءورت
28 قازاندا «ارسەلور ميتتال تەمىرتاۋ» اق-نىڭ كوستەنكو اتىنداعى كومىر شاحتالارىندا جويقىن جارىلىس بولىپ، سالدارىنان 46 ادام قازا تاۋىپ، 28 كەنشى جاراقات العان ەدى. وسى وقيعادان كەيىن قازاقستان بيلىگى «ارسەلور ميتتالتەمىرتاۋ» كومپانياسىن شەتەلدىك ينۆەستوردان ساتىپ الىپ، قازاقستاندىق ينۆەستورعا تاپسىردى. بۇل كەلىسىمدى قازاقستان ۇكىمەتىنە 286 ميلليون دوللارعا جاسادى. كومپانيانىڭ جاڭا اتاۋى «Qarmet» دەپ اتالدى.
الماتى حوستەلىندەگى ءورت
30 قاراشادا الماتىدا حوستەلدەردىڭ بىرىندە ءورت بولىپ، وقيعا ورنىنان 13 ادامنىڭ دەنەسى تابىلدى. قازا تاپقانداردىڭ توعىزى قازاقستاندىق، قالعانى شەتەلدىكتەر. مەملەكەت باسشىسى قازا تاپقان قازاقستاننىڭ جانە شەتەل ازاماتتارىنىڭ جاقىندارى مەن تۋعان-تۋىستارىنا كوڭىل ايتتى. الماتى اكىمدىگى جەرلەۋ ءراسىمىن ۇيىمداستىرۋعا جانە قازا تاپقانداردىڭ دەنەسىن تاسىمالداۋعا كومەكتەستى. ورتكە ورانعان حوستەلدىڭ اشىلعانىنا ءبىر جارىم اي بولعان. ول بانكتەردىڭ بىرىنە تيەسىلى بولعان. بانك ونى كەپىل-مۇلىك رەتىندە جالعا بەرگەن. جالپى حوستەلدە 72 ادام تۇرىپ جاتقان. 59 ادام سىرتقا شىعىپ ۇلگەرگەن. ق ر قىلمىستىق كودەكسىنىڭ 292-بابىنا سايكەس قىلمىستىق ءىس قوزعالدى.
ءمۇعالىم مەن وقۋشىلار قازا تاپتى
اقتوبە وبلىسى ىرعىز اۋدانىندا تاكسيگە مىنگەن 5 وقۋشى مەن 1 ءمۇعالىم جول اپاتىنا ۇشىرادى. Toyota Alphard ماشيناسى جۇك كولىگىنە سوعىلعان. قۇرىلىس ەلدى مەكەنىنىڭ ماڭىندا وقۋشىلار وتىرعان كولىك قارسى بەتكە شىعىپ، جۇك كولىگىمەن سوقتىعىستى. سالدارىنان 15 جانە 16 جاستاعى ەكى وقۋشى مەن 25 جاستاعى مەكتەپ ديرەكتورىنىڭ ورىنباسارى سول جەردە جان تاپسىردى. ولار اۋدان ورتالىعىنا پاندىك وليمپياداعا قاتىسۋعا بارا جاتقان. جاراقات العان 2007 جانە 2008 جىلى تۋعان قىزدار مەن 2008 جىلى تۋعان ەر بالا ىرعىز اۋىلىنا جەتكىزىلدى. ولار اۋىر سوققى العان.
اۆتوبۋس 3 ادامدى باسىپ كەتتى
22 جەلتوقسان كۇنى الماتىدا تاعى ءبىر شۋلى وقيعا بولدى. كەشكى ۋاقىتتا 47-باعىتتاعى قوعامدىق كولىكتىڭ جولاۋشىسى جانجال شىعارىپ، رۋلدەگى جۇرگىزۋشى ايەلدى ۇرىپ، تالدىرعان. باقىلاۋدان شىعىپ كەتكەن قوعامدىق كولىك ايالداما ماڭىندا تۇرعان ادامداردى قاعىپ، ءتورت كولىكپەن سوقتىعىستى. وقيعا سالدارىنان ءۇش ادام قازا تاۋىپ، تاعى 4 ادام دەنە جاراقاتتارىن الدى. ولار اۋرۋحاناعا جەتكىزىلدى.قوعامدىق كولىك جۇرگىزۋشىسىن ۇرعان جىگىت قاماۋعا الىندى. اۆتوبۋس جۇرگىزۋشىسى اۋرۋحانادا جاتىر.