22-25 تامىز ارالىعىندا ق ر عىلىم جانە جوعارى ءبىلىم ۆيسە-مينيسترى دينارا ششەگلوۆا باستاعان قازاقستاننان كەلگەن دەلەگاسيا سيفرلىق ترانسفورماسيانىڭ وزىق تاجىريبەسىن زەردەلەۋ، سونداي-اق وتاندىق ۋنيۆەرسيتەتتەردى ترانسفورماسيالاۋ ءۇشىن پراكتيكالىق سيفرلىق شەشىمدەردى تالقىلاۋ ماقساتىندا شەنچجەن جانە دۋنگۋان قالالارىنداعى نەگىزگى نىساندار مەن ءبىلىم بەرۋ مەكەمەلەرىنە باردى.
دەلەگاسيا قۇرامىنا قازاقستاننىڭ ون ءۇش جەتەكشى ۋنيۆەرسيتەتتەرىنىڭ وكىلدەرى مەن مينيسترلىكتىڭ سيفرلاندىرۋ جانە مەملەكەتتىك قىزمەتتەر دەپارتامەنتىنىڭ وكىلدەرى كىردى، دەپ حابارلايدى aqshamnews.kz
ءبىرىنشى كەزەكتە دەلەگاسيا شەنچجەن قالاسىنا توقتاپ، قىتايدىڭ سيفرلاندىرۋ سالاسىنداعى سوڭعى جەتىستىكتەرى كورسەتىلگەن سيفرلىق ترانسفورماسيا كورمە زالىنا باردى. ەكسپوزيسيا مەملەكەتتىك قىزمەتتەردى جاقسارتۋ جانە ءبىلىم بەرۋ مەكەمەلەرىن دامىتۋ ءۇشىن سيفرلىق ترانسفورماسيانىڭ الەۋەتىن كورسەتتى. سونداي-اق سمارت ءبىلىم بەرۋدىڭ وزىق شەشىمدەرى، سونىڭ ىشىندە اقىلدى سىنىپ، ينتەللەكتۋالدى وپەراسيالىق ورتالىق جانە ينتەللەكتۋالدى عىلىمي-زەرتتەۋ پلاتفورماسى كورسەتىلدى.
ساپار اياسىندا مينيسترلىك وكىلدەرى قىتايلىق ارىپتەستەرمەن سيفرلىق تەحنولوگيالار جانە جوعارى ءبىلىم سالاسىنداعى ىنتىماقتاستىقتى كەڭەيتۋ ماسەلەلەرىن تالقىلادى. سيفرلاندىرۋ سالاسىندا عىلىمي الەۋەتتى دامىتۋعا جانە تاجىريبە الماسۋعا باعىتتالعان بىرلەسكەن جوبالاردى ىسكە اسىرۋ مۇمكىندىكتەرى قارالدى.
«ءبىلىم، تالانت جانە ەكونوميكا بىر-بىرىمەن تىعىز بايلانىستى. Huawei قازاقستانداعى زياتكەرلىك ءبىلىم بەرۋدى دامىتۋعا، سونداي-اق عىلىم جانە جوعارى ءبىلىم مينيسترلىگىمەن جانە نەگىزگى ۋنيۆەرسيتەتتەرمەن ىنتىماقتاستىعىمىزدى تەرەڭدەتۋگە جانە كەڭەيتۋگە دايىن»، - دەپ اتاپ ءوتتى Huawei كومپانياسىنىڭ ۆيسە-پرەزيدەنتى لي سزيۋنفەن مىرزا.
قازاقستاندىق دەلەگاسيا سونىمەن قاتار جوعارى بىلىكتى مامانداردى دايارلاۋدىڭ يننوۆاسيالىق ورتالىعى بولىپ تابىلاتىن شەنچجەن ۋنيۆەرسيتەتتىك قالاسىنا باردى.
ساپاردى جالعاستىرا وتىرىپ، قازاقستاندىق تاراپ دۋنگۋان قالاسىنا بارىپ، وڭتۇستىك زاۋىتقا جانە Huawei (R&D) زەرتتەۋ جانە ازىرلەۋ ورتالىعىندا بولدى. قوناقتار زاۋىتتا قولدانىلاتىن وندىرىستىك قۋاتتار مەن وزىق تەحنولوگيالارمەن تانىستى، سونداي-اق زەرتتەۋلەر مەن ازىرلەمەلەر سالاسىنداعى ىنتىماقتاستىقتىڭ ىقتيمال باعىتتارىن تالقىلادى.
مينيسترلىك دەلەگاسياسىنىڭ جۇڭگو حالىق رەسپۋبليكاسىنا ساپارى سيفرلاندىرۋ، عىلىم جانە ءبىلىم بەرۋ سالاسىندا قىتايمەن ەكىجاقتى ىنتىماقتاستىقتى نىعايتۋ جولىنداعى ماڭىزدى قادام بولدى. وسى ساپار شەڭبەرىندە بىرلەسكەن جوبالاردى تالقىلاۋ جانە تاجىريبە الماسۋ ەكىجاقتى قاتىناستاردى ودان ءارى دامىتۋعا جانە ەكى ەلدىڭ عىلىمي جانە ءبىلىم بەرۋ الەۋەتىن نىعايتۋعا نەگىز بولادى.