«اتامەكەن» ۇكپ باسقارما ءتوراعاسى رايىمبەك باتالوۆتىڭ قازاقستاندا اتوم ەلەكتر ستانسياسىن سالۋ تۋرالى مالىمدەمەسى
«اتامەكەن» ۇكپ باسقارما ءتوراعاسى رايىمبەك باتالوۆ قازاقستاندا اتوم ەلەكتر ستانسياسىن (اەس) سالۋ يدەياسىنا قاتىستى ماڭىزدى مالىمدەمە جاسادى. تومەندە «اتامەكەن» ۇكپ سايتىندا جاريالانعان مالىمدەمەنىڭ تولىق ءماتىنى بەرىلگەن.
رايىمبەك باتالوۆتىڭ ايتۋىنشا، قازاقستاننىڭ ودان ءارى ەكونوميكالىق، ساياسي جانە الەۋمەتتىك دامۋىنىڭ ۆەكتورىن ايقىندايتىن ماڭىزدى شەشىم الدىندا تۇرمىز. رەفەرەندۋم قارساڭىندا ەلىمىزدىڭ بىرنەشە وڭىرلەرىندە قوعامدىق تىڭداۋلار وتكىزىلدى، بۇل تالقىلاۋلاردا ماماندار ءوز پىكىرلەرىن ءبىلدىرىپ، اتوم ەنەرگەتيكاسىنا قاتىستى كوزقاراستارىن جەتكىزدى. كوپتەگەن پىكىرلەر قازاقستاننىڭ بەيبىت اتوم ەنەرگياسىنان قۋات الاتىن الپاۋىت ەلگە اينالۋىن قولدايدى.
ۇلتتىق پالاتا دا بۇل جاۋاپتى شەشىمنەن تىس قالمادى. «اتامەكەن» ساراپشىلارى ءتۇرلى الاڭداردا ءوز ۇستانىمدارىن دالەلدەپ، بۇل باستامانى قولدادى. ۇلتتىق پالاتا ۇكىمەتتىڭ اەس سالۋ باستاماسىن تولىعىمەن قولدايدى جانە بۇل قادام وتاندىق بيزنەستىڭ دامۋىنا قۋاتتى سەرپىن بەرەتىنىنە سەنىمدى.
مالىمدەمەدە بىرنەشە ماڭىزدى اسپەكتىلەر اتاپ ءوتىلدى:
1. تۇراقتى ەنەرگيامەن قامتاماسىز ەتۋ: اەس تۇراقتى ەنەرگيامەن قامتاماسىز ەتەتىن نەگىزگى كوز بولىپ تابىلادى، بۇل بيزنەستى دامىتۋعا ۇلكەن مۇمكىندىك بەرەدى. اسىرەسە، تاۋ-كەن جانە مەتاللۋرگيا، ماشينا جاساۋ، وڭدەۋ ونەركاسىبى، قۇرىلىس جانە باسقا دا ەنەرگيانى قاجەت ەتەتىن سالالار ءۇشىن ماڭىزدى.
2. وزىق تەحنولوگيالاردى ەنگىزۋ: اەس سالۋ جانە پايدالانۋ ىلەسپەلى سالالاردىڭ دامۋىن ىنتالاندىراتىن وزىق تەحنولوگيالاردى، سونىڭ ىشىندە ءىت جانە يننوۆاسيالىق شەشىمدەردى ەنگىزۋدى تالاپ ەتەدى. سوڭعى ەكى جىلدا قازاقستاندىق ماماندار تۇركيا جانە باسقا دا وڭىرلەردە جاڭا تەحنولوگيالارمەن جۇمىس ىستەۋ تاجىريبەسىن مەڭگەرگەن.
3. جۇمىس ورىندارىن قۇرۋ جانە ادامي رەسۋرستاردى دامىتۋ: اەس سالۋ جاڭا جۇمىس ورىندارىن قۇرۋمەن قاتار، ادامي رەسۋرستاردى دامىتۋدى دا تالاپ ەتەدى. بۇل ءبىلىم بەرۋ سالاسىن دامىتۋعا جانە شاعىن، ورتا جانە ءىرى بيزنەستىڭ وسۋىنە سەپتىگىن تيگىزەدى.
قورىتىندىلاي كەلە، رايىمبەك باتالوۆ ۇلتتىق پالاتانىڭ اەس سالۋ باستاماسىن تولىقتاي قولدايتىنىن جانە بۇل شەشىمنىڭ قازاقستان ەكونوميكاسىنىڭ دامۋىنا ەلەۋلى مۋلتيپليكاتيۆتىك اسەر بەرەتىنىنە سەنىمدى ەكەنىن اتاپ ءوتتى.