قازاقستان مەن جۇڭگو اراسىنداعى ۆيزاسىز رەجيم كۇشىنە ەندى. ەلدەر اراسىنداعى تاسىمالعا سۇرانىستىڭ كۇتىلەتىن ءوسۋىن قاناعاتتاندىرۋ ءۇشىن كولىك مينيسترلىگى اۋەكومپانيالارمەن بىرلەسىپ، رەيستەر سانىن ۇلعايتۋدى جوسپارلايدى، دەپ حابارلايدى اlmaty-akshamy.kz.
كولىك مينيسترلىگى ازاماتتىق اۆياسيا كوميتەتىنىڭ حابارلاۋىنشا، Air Astana اۋەكومپانياسى 2023-2024 جىلدارداعى كۇزگى-قىسقى ماۋسىمدا جولاۋشىلار اعىنىنىڭ وسۋىنە قاراي الماتى – بەيجىڭ (اپتاسىنا 6 – دان 7 – گە دەيىن)، استانا - بەيجىڭ (اپتاسىنا 1-دەن 3-كە دەيىن) جانە الماتى - ءۇرىمشى (اپتاسىنا 2-دەن 7 رەيسكە دەيىن) باعىتتارى بويىنشا رەيستەر سانىن كوبەيتۋدى جوسپارلاپ وتىر .
سونىمەن قاتار، كەلەسى جىلى Air Astana شانحاي، گۋانچجوۋ جانە چەندۋ سياقتى جۇڭگو قالالارىنا جاڭا باعىتتار اشۋدى جوسپارلاپ وتىر.
"سونىمەن قاتار، قىتايلىق Air LOGISTICS جۇك اۋەكومپانياسى وسى جىلدىڭ قاراشاسىنان باستاپ الماتى – سيان باعىتى بويىنشا تۇراقتى جۇك رەيستەرىن ىسكە قوسۋدى جوسپارلاپ وتىر"، - دەلىنگەن ااك حابارلاماسىندا.
قازىرگى ۋاقىتتا قازاقستان مەن جۇڭگو اراسىندا اپتاسىنا جولاۋشىلارعا ارنالعان 27 تۇراقتى رەيس (قازاقستاندىق 11 رەيس جانە قىتايلىق 16 رەيس) ورىندالادى:
- الماتى - بەيجىڭ (Air Astana - اپتاسىنا 6 رەيس)؛
- استانا - بەيجىڭ(Air Astana - 1 رەيس)؛
- استانا - ءۇرىمشى (Fly Arystan - 2 رەيس، China Southern Airlines - 2 رەيس)؛
- الماتى - ءۇرىمشى (Air Astana - 2 رەيس، China Southern Airlines - 7 رەيس)؛
- الماتى - سيان (China Southern Airlines - 2 رەيس)؛
- استانا - سيان - بەيجىڭ (Air China - 2 رەيس)؛
- الماتى - حانچجوۋ (Loong Airlines - 3 رەيس).
ازاماتتىق اۆياسيا كوميتەتىنىڭ مالىمەتىنشە، قازاقستان مەن قىتايدىڭ اۆياسيالىق بيلىگى اراسىنداعى ۋاعدالاستىقتارعا سايكەس، ەكى ەلدىڭ تاعايىندالعان اۋەتاسىمالداۋشىلارىنا اپتاسىنا 84 رەيستى ورىنداۋعا رۇقسات ەتىلگەن.
"قازاقستاننىڭ اۋەكومپانيالارى ءۇشىن رۇقسات ەتىلگەن پۋنكتەر: بەيجىڭ، ءۇرىمشى، شانحاي، سانيا، سيان، چەندۋ، حايكوۋ. جۇڭگو اۋەكومپانيالارى ءۇشىن رۇقسات ەتىلگەن پۋنكتەر: استانا، الماتى، قاراعاندى، وسكەمەن، قىزىلوردا، شىمكەنت جانە جۇڭگو تاراپىنىڭ تاڭداۋى بويىنشا تاعى ءبىر قالا"، - دەپ تولىقتىردى ااك.