قازاقستان مەن جۇڭگو اراسىنداعى رەيستەر سانى اپتاسىنا 124 رەيسكە دەيىن ۇلعايتىلادى

سيان قالاسىندا جۇڭگو - ورتالىق ازيا ازاماتتىق اۆياسيا سالاسىنداعى ىنتىماقتاستىق جونىندەگى جۇمىس توبىنىڭ ءبىرىنشى كونفەرەنسياسى شەڭبەرىندە (س5+1) قازاقستان رەسپۋبليكاسىنىڭ اۆياسيالىق بيلىگى مەن جۇڭگو حالىق رەسپۋبليكاسى اراسىندا كەلىسسوزدەر جۇرگىزىلدى، دەپ حابارلايدى اlmaty-akshamy.kz.

قازاقستاندىق دەلەگاسيانى ازاماتتىق اۆياسيا كوميتەتىنىڭ ءتوراعاسى سالتانات تومپييەۆا، جۇڭگو دەلەگاسياسىن جۇڭگو ازاماتتىق اۆياسيا اكىمشىلىگى حالىقارالىق قاتىناستار دەپارتامەنتى باس ديرەكتورىنىڭ ورىنباسارى باي ۆەنلي باستادى.

كەلىسسوزدەر بارىسىندا ەكى ەلدىڭ بەكىتىلگەن تاسىمالداۋشىلارىنىڭ رۇقسات ەتىلگەن جيىلىكتەر سانىن اپتاسىنا 124 رەيسكە دەيىن ۇلعايتۋ جانە جيىلىكتەر بويىنشا قانداي دا ءبىر شەكتەۋسىز جۇك رەيستەرىن ورىنداۋ مۇمكىندىگى جونىندە ۋاعدالاستىققا قول جەتكىزىلدى.

سونىمەن قاتار تاسىمالداۋشىلار سانى ارتىپ، جۇڭگو اۋماعىندا جاڭا پۋنكتەر قوسىلدى.

ءوز كەزەگىندە قازاقستاندىق اۆياكومپانيالار حاينان ارالىنداعى (سانيا، حايكوۋ جانە سيۋنحاي قالالارى) پۋنكتترگە، ونىڭ ىشىندە بەسىنشى، التىنشى جانە جەتىنشى "اۋا ەركىندىگىن" پايدالانا وتىرىپ، شەكسىز رەيستەردى ورىنداۋ قۇقىعىنا يە بولدى.

كەلىسسوزدەر قورىتىندىسى بويىنشا ەكى ەل اراسىندا العاش رەت "اشىق اسپان" رەجيمى ورناتىلدى، ونىڭ شەڭبەرىندە ەكى ەلدىڭ تاعايىندالعان تاسىمالداۋشىلارى "اۋا ەركىندىگىنىڭ" بەسىنشى دارەجەسىن پايدالانا وتىرىپ، اپتاسىنا 42 رەيسكە دەيىن ورىنداۋ قۇقىعىنا يە بولدى.

ايتا كەتەرلىگى، قازاقستان رەسپۋبليكاسى تاسىمالداۋشىلارى "اۋا ەركىندىگىنىڭ" بەسىنشى دارەجەسىن پايدالانا وتىرىپ، قىتايعا رەيستەردى ورىنداۋ قۇقىعىنا يە بولعان الەمدەگى ساناۋلى ەلدەردىڭ ءبىرى (اقش جانە ءبىرقاتار ەۋروپا ەلدەرى) بولدى.

جۇڭگو قازاقستاننىڭ كوپتەگەن باعىتتار بويىنشا ستراتەگيالىق سەرىكتەسى، وسىعان بايلانىستى ەلدەر اراسىنداعى رەيستەردى ورىنداۋ ءۇشىن قۇقىقتىق بازانى كەڭەيتۋ ىنتىماقتاستىقتى ودان ءارى دامىتۋ ءۇشىن ماڭىزدى قادام بولىپ تابىلادى.