الماتى قالاسى بالالار شۇعىل مەديسينالىق كومەك كورسەتۋ ورتالىعىنىڭ حيرۋرگتارى كەنەت پنيەۆموتوراكسپەن تۇسكەن جاسوسپىرىمگە وتا جاسادى.
پنيەۆموتوراكس - وكپە مەن كەۋدە قۋىسى اراسىنداعى كەڭىستىكتە اۋانىڭ جينالۋى. ونىڭ سەبەبى جاراقات، وكپەنىڭ پەرفوراسياسى نەمەسە ينفەكسيا بولۋى مۇمكىن. پنيەۆموتوراكس وكپەنىڭ اۋامەن قىسىلۋىنا بايلانىستى كەۋدەدەگى شىدامسىز اۋىرسىنۋدى، ەنتىگۋدى جانە باسقا بەلگىلەردى تۋدىرادى، دەپ حابارلايدى اlmaty-akshamy.kz.
«ناۋقاس سول جاقتا كەنەت پنيەۆموتوراكس، ءبىرىنشى دارەجەلى تىنىس جەتكىلىكسىزدىگى دياگنوزىمەن شۇعىل تۇردە ءتۇستى. بالانىڭ جاعدايى اۋىر دەپ باعالاندى. وكپەدە سول جاقتا كۇرت السىرەگەن، وڭ جاقتا قاتاڭ تىنىس بايقالدى. قاتتى ەنتىگۋ ورىن الدى. بالا اۋرۋحاناعا جاتقىزىلىپ، بۇل جاعدايدىڭ سەبەپتەرىنە زەرتحانالىق جانە اسپاپتىق زەرتتەۋلەر جۇرگىزىلە باستادى»، - دەيدى الماتى قالاسى بالالار شۇعىل مەديسينالىق كومەك كورسەتۋ ورتالىعىنىڭ ديرەكتورى الىبەك سماعۇلوۆ.
اۋرۋحانا جاعدايىندا دارىگەرلەرگە بيۋالۋ ادىسىمەن پليەۆرا قۋىسىن درەناجداۋ - كەۋدە قابىرعاسىنا كىشكەنە تىلىك ارقىلى درەناجدى تۇتىكشەنى ەنگىزۋ ارقىلى اۋانى شىعارۋعا تۋرا كەلدى. درەناجدىق تۇتىك سۇيىقتىقتى نەمەسە اۋانى پليەۆرا قۋىسىنان شىعارۋعا مۇمكىندىك بەرەدى، قالىپتى قىسىم مەن وكپە كولەمىن قالپىنا كەلتىرەدى. بيۋالۋ بويىنشا درەناج تەك جەدەل جاردەم نەمەسە اۋرۋحانادا تاجىريبەلى حيرۋرگ پەن رەانيماتولوگتاردىڭ قاتىسۋىمەن جۇزەگە اسىرىلادى. بۇل شارا وكپە جاعدايىن اۋىرلاتۋدى بولدىرماۋ جانە قالىپتى تىنىس الۋدى قامتاماسىز ەتۋ ءۇشىن قاجەت بولدى.
بالانىڭ جاعدايى تۇراقتانعاننان كەيىن كت جاسالدى، وندا «3-قابىرعانىڭ الدىڭعى سەگمەنتى دەڭگەيىندە 1،9 سم، سول جاق وكپەنىڭ S3 بولىگىنە ەنەتىن ءجىتى سۇيەك ءوسۋى» انىقتالدى. بۇل پاتولوگيا ەكزوستوز دەپ اتالادى جانە وتە سيرەك كەزدەسەدى. ماسەلەن، ورتالىقتىڭ حيرۋرگيالىق قىزمەتىنىڭ 60 جىلدىق تاريحىندا بۇل بالادا بولعان ەكزوستوزدىڭ العاشقى كلينيكالىق جاعدايى. ورتالىقتىڭ ەڭ تاجىريبەلى دەگەن حيرۋرگتارىنىڭ بۇعان دەيىن قابىرعا ەكزوستوزىنا وتا جاساۋ تاجىريبەسى بولماعان.
حيرۋرگ ماماندارعا سۇيەك ءتىنىن الىپ تاستاپ، وكپەدەگى جىلانكوزدى تىگىپ، وكپەقاپ قۋىسىنا بىلتە قويىپ، تەكسەرۋگە ەكى ساعات قاجەت بولدى. وتا ءساتتى ءوتتى.
«قورىتىندى دياگنوز كەلەسىدەي بولدى: سول جاقتا 3-قابىرعانىڭ ەكزوستوزى، سول جاق وكپەنىڭ جوعارعى بولىگىندەگى جىلانكوز، سول جاقتا پنيەۆموتوراكس. بالانىڭ بۇل ىسىكپەن قانشا ۋاقىت جۇرگەنىن ناقتى ايتا المايمىز، ءبىراق ۋاقىت وتە كەلە وكپەدە ويىلعان جەر پايدا بولدى، سودان كەيىن جىلانكوز (ساڭىلاۋ) پايدا بولدى، وسى سەبەپتى ناۋقاستا پنيەۆموتوراكس جانە تىنىس الۋ جەتكىلىكسىزدىگى ورىن الدى. وسى ۋاقىتقا دەيىن ەكزوستوز ونى مازالاعان جوق. رەنتگەندىك زەرتتەۋ بۇل پاتولوگيانى كورسەتپەيدى. ءبىزدىڭ ورتالىقتا بالانىڭ دەنە ەرەكشەلىكتەرىنە سايكەس ارنايى كت اپپاراتى بار. كومپيۋتەرلىك توموگرافيانىڭ جانە رەنتگەنولوگيا بولىمىندەگى ارىپتەستەردىڭ كومەگىمەن اۋرۋ سەبەبىن انىقتادىق»، - دەيدى الماتى قالاسى بالالار شۇعىل مەديسينالىق كومەك كورسەتۋ ورتالىعىنىڭ حيرۋرگى جالعاس كۇنيازوۆ.
بالالاردا قابىرعا ەكزوستوزى (نەمەسە وستەوحوندروما) قاتەرسىز ىسىك بولىپ تابىلادى. ول اۋىرسىنۋ مەن ىڭعايسىزدىقتى تۋدىرۋى مۇمكىن، سيرەك جاعدايدا قابىرعا ەكزوستوزى كەۋدە قۋىسىنىڭ قالىپتى قوزعالىسىن شەكتەيدى، بۇل تىنىس الۋ پروبلەمالارىنا اكەلۋى مۇمكىن. قابىرعا ەكزوستوزى ادەتتە بالالار مەن جاسوسپىرىمدەردە كەزدەسەدى جانە سالىستىرمالى تۇردە سيرەك كەزدەسەتىن قۇبىلىس بولىپ سانالادى.