قىرعىز رەسپۋبليكاسىنا جۇمىس ساپارى بارىسىندا ق ر پرەمەر-مينيسترىنىڭ ورىنباسارى – ساۋدا جانە ينتەگراسيا ءمينيسترى سەرىك جۇمانعارين قىرعىز رەسپۋبليكاسىنىڭ مينيسترلەر كابينەتى ءتوراعاسىنىڭ ءبىرىنشى ورىنباسارى ادىلبەك قاسىمالييەۆپەن كەزدەستى، دەپ حابارلايدى Almaty-akshamy.kz Inform.kz-كە سىلتەمە جاساپ.
ەكى ەلدىڭ ۆيسە-پرەمەرلەرى «قاراسۋ» جانە «اق-تىلەك» اۆتوجول وتكىزۋ پۋنكتتەرى اۋدانىنداعى يندۋستريالىق ساۋدا-لوگيستيكالىق كەشەننىڭ ىسكە اسىرىلۋ بارىسىمەن تانىستى.
تاراپتار يتلك قىزمەتىن رەتتەۋ تۋرالى ۇكىمەتارالىق كەلىسىمگە قول قويۋدى 2022 جىلعى قازانعا دەيىن پىسىقتاۋعا ۋاعدالاستى.
ايتا كەتەيىك، بىرلەسكەن يسلك قۇرۋ جانە ونىڭ جۇمىس ىستەۋ تۇجىرىمداماسى ق ر پرەزيدەنتى ق. توقايەۆتىڭ 2019 جىلعى 27 قاراشاداعى قىرعىز رەسپۋبليكاسىنا مەملەكەتتىك ساپارىنىڭ جانە قازاقستان رەسپۋبليكاسى مەن قىرعىز رەسپۋبليكاسىنىڭ جوعارى مەملەكەتارالىق كەڭەسىنىڭ بەسىشى وتىرىسىنىڭ قورىتىندىلارى بويىنشا ەكى ەل باسشىلارىنىڭ تاپسىرماسىنا سايكەس ازىرلەندى.
سونداي-اق ساپار اياسىندا ۆيسە-پرەمەر قازاقستان-قىرعىز ساۋدا-ەكونوميكالىق ىنتىماقتاستىعى جونىندەگى جۇمىس توبىنىڭ ەكىنشى وتىرىسىنا قاتىستى.
سەرىك جۇمانعارين قىرعىز رەسپۋبليكاسى قازاقستاننىڭ ورتالىق ازيا وڭىرىندەگى نەگىزگى ساۋدا-ەكونوميكالىق ارىپتەستەرىنىڭ ءبىرى بولىپ تابىلاتىنىن اتاپ ءوتتى.
«قازاقستاندىق ستاتيستيكا دەرەكتەرى بويىنشا قىرعىز رەسپۋبليكاسى مەن قازاقستان رەسپۋبليكاسى اراسىنداعى تاۋار اينالىمى 2022 جىلعى قاڭتار-ماۋسىمدا $495،7 ملن-دى قۇرادى، بۇل وتكەن جىلدىڭ ۇقساس كەزەڭىمەن سالىستىرعاندا 5،7%-عا ارتىق، ونىڭ ىشىندە ەكسپورت – $303،3 ملن، يمپورت – $192،3 ملن»، - دەدى سەرىك جۇمانعارين.
تاراپتار ءوزارا ساۋدانى ۇلعايتۋ ماقساتىندا وتىرىس بارىسىندا قول قويىلعان «قازاقستان رەسپۋبليكاسىنىڭ ساۋدا جانە ينتەگراسيا مينيسترلىگى مەن قىرعىز رەسپۋبليكاسىنىڭ اۋىل شارۋاشىلىعى مينيسترلىگى اراسىنداعى جەمىس-كوكونىس ونىمدەرىن جەتكىزۋدى ۇيىمداستىرۋ نيەتى تۋرالى ءوزارا تۇسىنىستىك تۋرالى» مەموراندۋم شەڭبەرىندە قىرعىز رەسپۋبليكاسىنان قازاقستانعا ەرتە جەمىس-كوكونىس ونىمدەرىن جەتكىزۋدى جۇزەگە اسىرۋ جونىندە ۋاعدالاستى.
سونداي-اق قول قويىلعان «قازاقستان رەسپۋبليكاسىنىڭ ساۋدا جانە ينتەگراسيا مينيسترلىگى مەن قىرعىز رەسپۋبليكاسىنىڭ ەكونوميكا جانە كوممەرسيا مينيسترلىگى اراسىنداعى ىنتىماقتاستىق جونىندەگى مەموراندۋم اياسىندا تاراپتار ساۋدا راسىمدەرىن جەڭىلدەتۋگە، بيزنەس جۇرگىزۋ شىعىندارىن ازايتۋعا كەلىستى جانە ەلدەر اراسىنداعى ەلەكتروندىق قۇجاتتارمەن ءوزارا الماسۋداعى ىنتىماقتاستىقتى دامىتۋعا نيەتتى.