قازاق جانە تۇركى انيماسياسىنىڭ نەگىزىن قالاۋشى امەن قايداروۆتىڭ 100-جىلدىعىنا ارنالعان «امەن اعانىڭ عاجايىپ اعاشى» اتتى قىسقامەتراجدى انيماسيالىق فيلم جارىققا شىعادى، دەپ حابارلايدى Almaty-akshamy.kz Inform.kz-كە سىلتەمە جاساپ.
انيماسيالىق كارتينا ق ر مادەنيەت جانە سپورت مينيسترلىگىنىڭ تاپسىرىسى بويىنشا ۇلتتىق كينونى قولداۋ مەملەكەتتىك ورتالىعىنىڭ قولداۋىمەن «قازاقفيلم» كينوستۋدياسىندا ءتۇسىرىلىپ جاتىر. انيماسيالىق ءفيلمنىڭ سەناريىن امەن قايداروۆتىڭ شاكىرتى تامارا مۇقانوۆا مەن قازاق ميفولوگياسىن زەرتتەۋشى، جازۋشى، كينوسەناريست زيرا ناۋرىزبايەۆا جازدى.
قازىرگى تاڭدا كەيىپكەرلەردىڭ باستاپقى ەسكيزدەرى دايىن.
«فيلم جەلىسى امەن اعانىڭ باۋىرجان نوگەربەكوۆتىڭ «قارلىعاشتىڭ قۇيرىعى نەگە ايىر؟» فيلمىندە جۇمىس ىستەگەن جىلدارىمەن تىكەلەي بايلانىستى. ول كىسىگە شابىت قالاي كەلدى، ءتۇسىرىلىم كەزىندەگى باستان كەشىرگەن قيىنشىلىقتارى مەن قىزىقتارى جايلى باياندالادى. نەگىزگى مالىمەتتەر مەن ادەبي دەرەكتەر كوزى باۋىرجان نوگەربەكوۆتىڭ «كوگدا وجيۆاەت سكازكي» كىتابىنان الىندى»-، دەدى ءفيلمنىڭ قويۋشى رەجيسسەرى ءجانادىل بايداربەكوۆ.
ايتۋىنشا، جوباعا 10-نان اسا ادام جۇمىلدىرىلعان. جوسپار بويىنشا جىل سوڭىنا دەيىن تۋىندىنى اياقتاۋ مىندەتى تۇر.
«جالپى 10 مينۋتتىق فيلم جاساۋعا كەمىندە جارتى جىل ۋاقىت كەتەدى. ءقازىر بىزدە تەحنيكالىق تۇرعىدان ءبىراز قيىندىقتار بار. سەبەبى سۋرەتتە تەك مۋلتفيلم جاساۋشىلاردى عانا ەمەس، امەن اعانىڭ جانىندا جۇمىس ىستەگەن اتاقتى سۋرەتشىلەر، تانىمال كومپوزيتورلار- نۇرعيسا تىلەندييەۆ، ولجاس سۇيلەمەنوۆ سىندى مادەنيەتىمىزدىڭ كورنەكتى قايراتكەرلەرىنىڭ وبرازىن، ءتۇر الپەتىن بارىنشا ۇقساتىپ كەلتىرۋ ۇلكەن جاۋاكەرشىلىكتى جۇكتەپ وتىر» دەپ ءبولىستى رەجيسسەر.
جاڭا انيماسيالىق فيلم قازاقستاندىق كورەرمەنگە الداعى جىلدىڭ كوكتەم ايىندا امەن قايداروۆتىڭ 100 جىلدىق مەرەيتويى قارساڭىندا جول تارتادى.