دەمەك ەكى ەل جول سالاسىن دامىتۋعا باعىتتالعان عىلىمي جوبالاردى بىرلەسە جۇرگىزىپ، سالا ماماندارىن دايارلايدى.
قازاقستاندىق جولشىلار جۇمىس ساپارىمەن پولشانىڭ ۆارشاۆا مەن كراكوۆ قالالارىنا باردى. دەلەگاسيا قۇرامىنا قازاقستان جول عىلىمي-زەرتتەۋ ينستيتۋتى (قازجولعزي) مەن قازاقستان رەسپۋبليكاسىنداعى PIARC ۇلتتىق كوميتەتىنىڭ وكىلدەرى كىردى. كەزدەسۋ جولدار مەن كوپىرلەردى زەرتتەۋ ينستيتۋتىندا (IBDIM) ءوتتى، دەپ حابارلايدى Almaty-akshamy.kz كولىك مينيسترلىگىنە سىلتەمە جاساپ.
پولشاداعى اۆتوموبيل جولدارى مەن كوپىرلەردى عىلىمي-زەرتتەۋ ينستيتۋتىنىڭ وكىلدەرىمەن، سونداي-اق جەرگىلىكتى جول كونگرەسىنىڭ پرەزيدەنتى زبيگنيەۆ كوتليارەكپەن جانە تەحنيكالىق ديرەكتور الەكساندرۋ سكورۋپسكۋمەن كەزدەسۋ بارىسىندا تاراپتار ەكى ەل اراسىنداعى ىنتىماقتاستىقتى نىعايتۋدىڭ پەرسپەكتيۆالارىن تالقىلاندى.
كەزدەسۋ عىلىمي جوبالاردى جۇزەگە اسىرۋ جانە نورماتيۆتىك بازانى رەفورمالاۋ سالاسىنداعى تاجىريبە الماسۋ الاڭىنا اينالدى. جولداردى سالۋ ءارى كۇتىپ ۇستاۋداعى يننوۆاسيالىق تەحنولوگيالارعا ەرەكشە نازار اۋدارىلدى. كەلىسسوزدەر قورىتىندىسى بويىنشا ىنتىماقتاستىق تۋرالى كەلىسىمگە قول قويىلدى.
سونىمەن بىرگە كراكوۆ تەحنولوگيالىق ۋنيۆەرسيتەتىنىڭ رەكتورى جانە پروفەسسور اندجەي شارامەن مەموراندۋمعا قول قويىلدى.
بۇل كەلىسىم زامان تالابىنا ساي كۇردەلى ينجەنەرلىك جانە تەحنولوگيالىق مىندەتتەردى شەشۋگە قابىلەتتى مامانداردى دايارلاۋعا باعىتتالعان. ول عىلىمي قىزمەتكەرلەردى تاعىلىمدامادان وتكىزۋدىڭ جالپى باعدارلامالارىن جانە اۆتوموبيل جولدارىن سالۋ، پايدالانۋ جانە كۇتىپ ۇستاۋ سالاسىندا تاجىريبە الماسۋدى كوزدەيدى.