الماتىدا مەكتەپ جانىنداعى لاگەرلەر قاشان اشىلادى؟
الماتىدا بيىل جازعى دەمالىس كەزىندە 266 مىڭ بالا دەمالادى.
مەكتەپ جانىنداعى لاگەرلەر 27 مامىردا جۇمىس ىستەي باستايدى. بيىل بالالار ءۇشىن ساۋىقتىرۋ جانە جۇمىسپەن قامتۋ سىندى ەكى باعىت بويىنشا دەمالىس ۇيىمداستىرىلدى، دەپ حابارلايدى Almaty-akshamy.kz.
ساۋىقتىرۋ دەمالىسى اياسىندا جەتىم بالالاردى، ەرەكشە ءبىلىم بەرۋ قاجەتتىلىگى بار، اتا-اناسىنىڭ قامقورلىعىنسىز قالعان بالالاردى، سونداي-اق از قامتىلعان جانە كوپبالالى وتباسىلاردان شىققان بالالاردى 100% قامتۋ جوسپارلانۋدا. وقۋشىلار سارايىنىڭ «ورنەك» لاگەرىندە 3 ماۋسىمدا 900 بالا دەمالا الادى. بۇل «جانۇيا» بالالار ءۇيىنىڭ تاربيەلەنۋشىلەرى، حالىقتىڭ الەۋمەتتىك وسال توپتارىنىڭ بالالارى، سونداي-اق بايقاۋلار مەن جارىستاردىڭ جەڭىمپازدارى.
جۇمىسپەن 263 مىڭ وقۋشى قامتىلادى. وسى باعىت اياسىندا وبلىس پەن رەسپۋبليكا بويىنشا تۋريستىك ساپارلار، كوشپەلى سپورتتىق جيىندار، 3 كۇندىك ساپارلار، ەكسكۋرسيالار، پىكىرسايىس لاگەرلەرى، تىلدىك جازعى مەكتەپتەر جانە ت.ب. ۇيىمداستىرىلادى.
17 كوللەدج بازاسىندا العاش رەت 8 سىنىپ وقۋشىلارىنا ارنالعان «جاز – بولاشاق ماماندىقپەن» جوباسى جۇزەگە اسادى. 200-دەن استام وقۋشىعا جازعى دەمالىستى قىزىقتى ءارى ءتيىمدى وتكىزۋگە مۇمكىندىك بەرىلەدى.
№57 جانە 171 مەكتەپتەردە ەتنو-لاگەرلەر جۇمىس ىستەيدى. مەكتەپ اۋماعىندا كيىز ۇيلەر ورناتىلادى. باعدارلاما اياسىندا ۇلتتىق سالت-داستۇرلەردى، قۇندىلىقتار مەن مادەنيەتتى، ادەت-عۇرىپتاردى، قولونەر، كورپە تىگۋ، توقۋ داعدىسى ۇيرەتىلەدى.
سونداي-اق، وسى جازدا 16 سپورت لاگەرى اشىلادى، وندا زياتكەرلىك جانە شىعارماشىلىق ويىندار، سپورتتىق-شىعارماشىلىق بايقاۋلار، ۆيكتورينالار جانە ت.ب. ۇيىمداستىرىلادى.
سونىمەن قاتار، 3 ماۋسىمنان باستاپ الاتاۋ جانە ناۋرىزباي اۋداندارىنداعى وقۋشىلاردىڭ يننوۆاسيالىق شىعارماشىلىق ورتالىقتارىندا «بالالار مەن كينو»، «بالالار مەن تەاتر»، «Stem-لاگەر» بىرەگەي جوبالارى ىسكە اسىرىلادى.
جالپى بيىلعى جىلى 150 مەكتەپتە ىستىق تاماقپەن قامتاماسىز ەتىلگەن مەكتەپ جانىنداعى لاگەرلەر جۇمىس ىستەيدى. بۇل لاگەرلەردە 40 مىڭنان استام بالا دەمالادى. ال 96 مىڭ بالا تاماقتانۋسىز مەكتەپ جانىنداعى لاگەرلەرمەن قامتىلادى.
مەكتەپ جانىنداعى لاگەرگە بالانى ورنالاستىرۋ ماسەلەسى بويىنشا مەكتەپتىڭ الەۋمەتتىك پەداگوگىنا قابىلداۋ تۋرالى وتىنىشپەن جۇگىنۋ قاجەت.
بۇعان قوسا، جاز بويى وقۋشىلار سارايى، وقۋشىلار ۇيلەرى جانە يننوۆاسيالىق شىعارماشىلىق ورتالىقتارى سىندى مەملەكەتتىك قوسىمشا ءبىلىم بەرۋ ۇيىمدارىندا ۇيىرمەلەر مەن سەكسيالار تەگىن جۇمىس ىستەيدى. اتاپ ايتساق، شەشەندىك ونەر، اكتەرلىك شەبەرلىك، جۋرناليستيكا، دومبىرا، ۆوكال، فورتەپيانو، حورەوگرافيا، قىش ونەرى، توعىزقۇمالاق، بوكس، دزيۋدو، زاماناۋي باۋ-باقشا، Lego روبوتوتەحنيكاسى، 3D مودەلدەۋ، AR/VR، اۆيامودەلدەۋ، باعدارلامالاۋ. تەگىن ۇيىرمەلەر بارلىق ساناتتاعى بالالارعا ارنالعان.