وقۋ-اعارتۋ ءمينيسترى قازاقستاندىق وقۋشىلاردى 2023-2024 وقۋ جىلىنىڭ اياقتالۋىمەن قۇتتىقتادى. بۇگىن ەلىمىزدىڭ بارلىق مەكتەپتەرىندە ءبىر مەزگىلدە «ءبىلىمىم - وتانىما» ءبىرىڭعاي سىنىپ ساعاتى ءوتتى.
سىنىپ ساعاتىنىڭ اياسىندا مينيستر بارلىق مەكتەپ وقۋشىلارىن 2023-2024 وقۋ جىلىن تابىستى اياقتاۋلارىمەن قۇتتىقتادى، دەپ حابارلايدى Almaty-akshamy.kz سالا مينيسترلىگىنە سىلتەمە جاساپ.
عاني بەيسەمبايەۆ ءبىرىڭعاي سىنىپ ساعاتى - ءبىر جىلدا اتقارىلعان جۇمىستى قورىتىندىلاپ، بالالاردىڭ ءوز مۇعالىمدەرىنە، مەكتەپ ۇجىمىنا، اتا-انالارىنا العىس ايتۋىنا مۇمكىندىك بەرەتىنىن اتاپ ءوتتى.
«سىزدەردىڭ ەڭبەكپەن العان بىلىمدەرىڭىز وتانعا دەگەن سۇيىسپەنشىلىك پەن قۇرمەتتىڭ بەلگىسى! بۇگىن سىزدەرمەن بىرگە ەلىمىزدەگى ءتورت ميلليونعا جۋىق وقۋشى كەلەسى سىنىپتارعا اۋىسادى. ءبىر جىلدا سىزدەر ەسەيىپ، وقۋدا، شىعارماشىلىقتا، سپورتتا ۇلكەن جەتىستىكتەرگە جەتتىڭىزدەر. وسى وقۋ جىلىندا ءبىزدىڭ وقۋشىلار 10 حالىقارالىق وليمپيادادا 243 مەدال جەڭىپ الدى. ونىڭ ىشىندە 20 التىن، 95 كۇمىس، 128 قولا مەدال بار. سىزدەردىڭ ءارقايسىلارىڭىز ءوز ناتيجەلەرىڭىزبەن ماقتانا الاسىزدار! سىزدەردى شىن جۇرەكتەن قۇتتىقتايمىن جانە مۇنىمەن توقتاپ قالماۋلارىڭىزدى تىلەيمىن!»، - دەدى ول ءوز قۇتتىقتاۋىندا.
مينيستر سونداي-اق سۋ تاسقىنىمەن كۇرەستە الدىڭعى قاتاردا بولىپ، كومەككە جۇمىلعان قازاقستاندىق پەداگوگتەرگە العىسىن ءبىلدىردى.
«قيىندىقتارعا مويىنسۇنباي، بالالارىمىزدى وقىتۋدى جالعاستىردىڭىزدار، مەكتەپتەردى قۇتقارىپ، مۇقتاج جاندارعا قولداۋ كورسەتتىڭىزدەر جانە اعارتۋشىلىق ميسسيانى ادال اتقاردىڭىزدار. سىزدەردىڭ ەرەن ەڭبەكتەرىڭىز بەن ۇستازدىق كاسىپكە ادالدىقتارىڭىز ءۇشىن ەڭ شىنايى ريزاشىلىعىمدى بىلدىرەمىن!»، - دەدى عاني بەيسەمبايەۆ.
ءسوزىن قورىتىندىلاي كەلە، مينيستر مەكتەپ، كوللەدج ءبىتىرۋشى تۇلەكتەرگە الداعى ەمتيحانداردا ساتتىلىك تىلەدى. ايتا كەتۋ كەرەك، 2023-2024 وقۋ جىلىن 3،8 ملن-نان استام وقۋشى اياقتاۋدا. ونىڭ ىشىندە 186 مىڭنان استام 11-سىنىپتى ءبىتىرۋشى بار. سونداي-اق 150 مىڭنان استام كوللەدج ءبىتىرۋشى ديپلوم يەلەنىپ، تولىققاندى مامان بولادى.