تۋريزم جانە سپورت ءمينيسترى ەرمەك مارجىقپايەۆ كورەيا رەسپۋبليكاسىنىڭ قازاقستانداعى توتەنشە جانە وكىلەتتى ەلشىسى چجو تە-يكپەن كەزدەستى.
كەزدەسۋ مەملەكەت باسشىسىنىڭ تۋريزم جانە سپورت مينيسترلىگى، ۇلتتىق وليمپيادا كوميتەتى جانە سپورت فەدەراسيالارى بىرلەسە جۇمىس ىستەۋ كەرەك دەگەن تاپسىرماسىن ورىنداۋ ماقساتىندا قۇرىلعان كانۆونداعى IV قىسقى جاسوسپىرىمدەر وليمپياداسىنا جانە پاريجدەگى جازعى وليمپيادا مەن پاراليمپياداعا دايىندىق جونىندەگى شتابتىڭ كەڭسەسىندە ءوتتى، دەپ حابارلايدى اlmaty-akshamy.kz.
شتابتىڭ نەگىزگى جۇمىسى – سپورتشىلاردىڭ الداعى جارىستارعا ساپالى دايىندىعىن قامتاماسىز ەتۋ. ەكى ەلدىڭ سپورتشىلارى ءتۇرلى دەڭگەيدەگى جارىستارعا بەلسەنە قاتىسىپ، بىرلەسكەن وقۋ-جاتتىعۋ جيىندارىن وتكىزىپ كەلەدى. ماسەلەن، 2023 جىلدىڭ شىلدە ايىندا بوكستان ايەلدەر قۇراماسى كورەيانىڭ پورەن قالاسىندا وقۋ-جاتتىعۋ جيىنىن وتكىزدى. سونداي-اق بىلتىر كورەيا رەسپۋبليكاسىنىڭ سپورتشىلارى ەلىمىزدە ۇيىمداستىرىلعان جەڭىل اتلەتيكادان ازيا چەمپيوناتىندا جانە كۇرەس تۇرلەرى بويىنشا ازيا بىرىنشىلىگىندە ب ا ق سىنادى. 2023 جىلدىڭ تامىزىندا كورەي سپورتشىلارى ۇستەل تەننيسىنەن الماتىداعى «2023 WTT Contender Almaty» حالىقارالىق تۋرنيرىندە ونەر كورسەتتى. كەزدەسۋ بارىسىندا مينيستر ەكى ەلدىڭ سپورتتىق وقۋ ورىندارى اراسىندا ىنتىماقتاستىق ورناتۋعا، فۋتبول بويىنشا جولداستىق ماچتار وتكىزۋگە، سپورتتىق تاماقتانۋ جانە سپورتتىق مەديسينا سالاسىنداعى تاجىريبەنى زەرتتەۋگە، سونداي-اق بيومەحانيكا، پسيحولوگيا جانە فيزيولوگيا سالاسىنداعى كاسىبي سپورتتى زەرتتەۋمەن اينالىساتىن قازاقستاندىق مامانداردى تاعىلىمدامادان وتكىزۋگە نيەتتى ەكەنىن ءبىلدىردى.
«كورەيا رەسپۋبليكاسى كوپتەگەن سپورت اۋەسقويلارى مەن ءتيىمدى ينۆەستيسيالار سياقتى ماڭىزدى فاكتورلاردىڭ ارقاسىندا بۇگىندە سپورتتىق دەرجاۆاعا اينالىپ وتىر. ءبىز ءۇشىن ەكى ەلدىڭ سالالىق فەدەراسيالارى اراسىندا تىعىز بايلانىس ورناتۋ جانە تاجىريبەنى زەردەلەۋ وتە ماڭىزدى. كورەي سپورتشىلارىنا وقۋ-جاتتىعۋ جيىندارىن وتكىزۋگە رەسپۋبليكالىق وليمپيادالىق دايارلىق بازاسىن ۇسىنامىز. سونداي-اق بيىل قازاقستاندا V دۇنيەجۇزىلىك كوشپەندىلەر ويىندارى وتەتىنىن اتاپ وتكىم كەلەدى. ءدۇبىرلى دوداعا الەمنىڭ 100-دەن استام ەلىنەن 3 مىڭنان اسا سپورتشى قاتىسادى دەپ جوسپارلاپ وتىرمىز. ويىندار باعدارلاماسىنا ءداستۇرلى كورەي كۇرەسى «سسيرىم» دە ەنگەن. كورەي دەلەگاسياسى مەن سپورتشىلارىن وسى اۋقىمدى ءىس-شاراعا قاتىسۋعا شاقىرامىن»، - دەدى ەرمەك مارجىقپايەۆ.
كورەيا رەسپۋبليكاسىنىڭ ەلشىسى كەزدەسۋگە شاقىرعانىنا ريزاشىلىعىن ءبىلدىرىپ، ءوزارا ىنتىماقتاستىقتا جۇمىس ىستەۋگە مۇددەلى ەكەندىگىن جەتكىزدى. ەلشى ءوز سوزىندە دۇنيەجۇزىلىك كوشپەندىلەر ويىندارىن وتكىزۋگە ساتتىلىك تىلەپ، ەكى ەل اراسىندا جىل سايىن دامىپ كەلە جاتقان تۋريزم جانە سپورت سالاسىندا كوپتەگەن بايلانىس نۇكتەلەرى بار ەكەنىن اتاپ ءوتتى. سونىمەن قاتار كەزدەسۋ بارىسىندا ەكى ەلدىڭ وكىلدەرى كانۆوندا وتەتىن جاسوسپىرىمدەر اراسىنداعى قىسقى وليمپيا ويىندارىن تالقىلاپ، وسى جارىستان، قازاقستاندىق سپورتشىلاردان قانداي ناتيجە كۇتەتىنىنە قاتىستى وي ءبولىستى.