وزبەكستاندا ەنەرگەتيكالىق جانە گازدالعان سۋسىندارعا اكسيزدىك سالىق ەنگىزىلەدى.
اتالعان سۋسىنداردىڭ ءاربىر ليترىنە 2000 سۋم كولەمىندە اكسيز ەسەپتەلەدى، دەپ حابارلايدى Almaty-akshamy.kz
قۇرامىندا قانتى بار گازدالعان سۋسىندار ءۇشىن اكسيز سالىعى ليترىنە 500 سۋم. ەلدىڭ دەنساۋلىق ساقتاۋ مينيسترلىگى قانت ديابەتى كوبەيۋى مۇمكىن دەپ الاڭدايدى. جالپى 18 جاسقا تولماعاندارعا ەنەرگەتيكالىق سۋسىنداردى ساتۋ جانە ولاردى جارنامالاۋعا شەكتەۋ قوياتىن زاڭ التى جىل بۇرىن قابىلدانعان. اكسيزدەن تۇسكەن قارجى مەديسينا سالاسىن دامىتۋ قورىنا اۋدارىلادى.
«سوڭعى 30 جىلدا سوزىلمالى جانە جۇقپالى اۋرۋلار سانى كۇرت ءوستى. قانت ديابەتىنىڭ تارالۋى 2،1% دان 11% عا دەيىن ارتقان. ەڭ سوراقىسى، دۇرىس تاماقتانباۋ سالدارىنان بولاتىن ءولىم- ءجىتىم كورسەتكىشى 100 مىڭ تۇرعىنعا شاققاندا 400 ادامدى قۇراپ وتىر»، - دەيدى وزبەكستان رەسپۋبليكاسى دەنساۋلىق ساقتاۋ جانە ستراتەگيالىق دامۋ ينستيتۋتىنىڭ ديرەكتورى نوديرا اليحانوۆا.