الماتىدا Agroworld Kazakhstan كورمەسى ءوتتى.
ونىڭ اياسىندا قازاقستان مەن نيدەرلاند اۋىل شارۋاشىلىعىن جانە اگروبيزنەستى دامىتۋ سالالارىنداعى ماسەلەلەردى جوعارى دەڭگەيدە تالقىلاۋ ءۇشىن رەسمي نەگىزدى قامتاماسىز ەتەتىن ءوزارا تۇسىنىستىك جانە بىرلەسكەن اۋىل شارۋاشىلىعى كوميتەتىن قۇرۋ تۋرالى مەموراندۋمعا قول قويدى، دەپ حابارلايدى Almaty-akshamy.kz ق ر اۋىل شارۋاشىلىعى مينيسترىلىگىنە سىلتەمە جاساپ.
ق ر اۋىل شارۋاشىلىعى ۆيسە-مينيسترى ازات سۇلتانوۆ قۇرىلعان كوميتەتتىڭ نەگىزگى ەرەجەلەرىن ايتتى. وسىلايشا، قازاقستان مەن نيدەرلاند وكىلدەرى جىل سايىن كەزدەسىپ، اوك سالاسىنداعى بىرلەسكەن جوبالاردى ودان ءارى ىسكە اسىرۋ ءۇشىن بيزنەس وكىلدەرى مەن مامانداردى وتىرىستارعا شاقىراتىن بولادى.
«نيدەرلاند كورولدىگىمەن اۋىل شارۋاشىلىعىندا ىنتىماقتاستىق ءبىز ءۇشىن باسىم باعىتتاردىڭ ءبىرى جانە بۇل سالانىڭ الەۋەتى ۇلكەن. ق ر اۋىل شارۋاشىلىعى مينيسترلىگى سالاداعى ەكىجاقتى ىنتىماقتاستىقتى كەڭەيتۋگە جانە تاۋار اينالىمى كولەمىن ۇلعايتۋعا مۇددەلى. قازاقستاننىڭ ساپالى جانە ەكولوگيالىق تازا اۋىل شارۋاشىلىعى ونىمدەرىن وندىرۋگە جانە ەكسپورتتاۋعا مۇمكىندىگى زور»، - دەپ اتاپ ءوتتى ازات سۇلتانوۆ.
ونىڭ ايتۋىنشا، 2023 جىلدىڭ توعىز ايىندا مەملەكەتتەر اراسىنداعى اۋىل شارۋاشىلىعى تاۋارلارىنىڭ اينالىمى 61،7 ملن دوللاردى قۇرادى. بۇل 2022 جىلدىڭ سايكەس كەزەڭىمەن (46،6 ملن دوللار) سالىستىرعاندا 32،4%-عا ارتىق. ازات سۇلتانوۆ نيدەرلاندتىق ارىپتەستەرىنە قازاقستان ازىق-تۇلىك قاۋىپسىزدىگىنىڭ جاھاندىق يندەكسىندە 113 ەلدىڭ اراسىندا 32ء-شى ورىندا تۇرعانىن جانە پوستكەڭەستىك مەملەكەتتەر اراسىندا كوشباسشى ەكەنىن ايتتى. قازاقستاننىڭ جاقىن جانە الىس نارىقتار ءۇشىن ازىق-تۇلىك جەتكىزۋشىسى بولۋعا الەۋەتى جەتكىلىكتى.
بۇدان ءارى ۆيسە-مينيستر مەموراندۋم اياسىندا ىنتىماقتاستىق جونىندەگى قازاقستاندىق تاراپتىڭ ۇسىنىستارىن ايتتى. ءبىرىنشىسى – عىلىم مەن ءبىلىم سالاسىنداعى ىنتىماقتاستىقتى جانداندىرۋ. ازات سۇلتانوۆ ۋنيۆەرسيتەتتەر اراسىندا ستۋدەنتتەرمەن الماسۋ باعدارلاماسىن ۇيىمداستىرۋدى، سونداي-اق قازاقستاندىق ستۋدەنتتەر مەن ماماندارعا نيدەرلاندىنىڭ اگرارلىق ۋنيۆەرسيتەتتەرىندە وقۋعا بىرلەسكەن گرانتتار ءبولۋدى ۇسىندى.
«ەكىنشىسى – ۆەتەريناريا سالاسى بويىنشا تاجىريبە الماسۋ جۇمىستارىن جانداندىرۋ. نيدەرلاندتىق Royal GD ۆەتەرينارلىق كومپانياسىنان جانۋارلار اۋرۋلارىنىڭ الدىن الۋ جانە ەمدەۋ جولىنداعى جوبانى جۇزەگە اسىرۋعا دايىندىق تۋرالى ۇسىنىس ءتۇستى. ول قازاقستاندىق تاجىريبەنى زەردەلەۋدى جانە ونى جەتىلدىرۋ بويىنشا ۇسىنىستار ازىرلەۋدى كوزدەيدى»، -دەدى ۆيسە-مينيستر.
ءۇشىنشى ۇسىنىس – قازاقستاندا تۇقىم شارۋاشىلىعىن دامىتۋ. نيدەرلاندىنىڭ باي تاجىريبەسىن ەسكەرە وتىرىپ، داقىلداردىڭ تۇقىمىن كەڭ اۋقىمدا وندىرۋدە قازاقستاننىڭ اۋىل شارۋاشىلىعى سالاسىن زەرتتەۋ ءتيىمدى بولادى. سوندىقتان ازات سۇلتانوۆ كوميتەتتەن نيدەرلاندىنىڭ تاريحي تاجىريبەسى تۋرالى تالدامالىق اقپارات جىبەرۋ مۇمكىندىگىن قاراستىرۋدى سۇرادى.
«قازاقستاننىڭ اۋىل شارۋاشىلىعى مينيسترلىگى جوعارىدا اتالعان بارلىق باعىتتار بويىنشا نيدەرلاندتىق ارىپتەستەرمەن بەلسەندى ءوزارا ءىس-قيمىل جاساسۋعا دايىن. بۇگىنگى وتىرىستا قول جەتكىزىلگەن ۋاعدالاستىقتار ەكى ەلدىڭ اۋىل شارۋاشىلىعى سالاسىنداعى ىنتىماقتاستىعىن ودان ءارى دامىتۋعا ىقپال ەتەتىنىنە سەنىمدىمىن»، - دەپ تۇيىندەدى ءسوزىن ۆيسە-مينيستر.