«BURKIT»: اسا ءقاۋىپتى قىلمىسقا جەدەل ارەكەت ەتەتىن ەتەتىن ارنايى جاساق تۋرالى فيلم پروكاتقا شىقتى

«BURKIT»: اسا ءقاۋىپتى  قىلمىسقا جەدەل ارەكەت ەتەتىن ەتەتىن ارنايى جاساق تۋرالى فيلم پروكاتقا شىقتى سۋرەتتەر: ۇلتتىق كينونى قولداۋ ورتالىعى

2 قاراشادان باستاپ ەلىمىزدىڭ بارلىق كينوتەاترىندا - مەملەكەت قاۋىپسىزدىگى مەن ەل تۇرعىندارىنىڭ ومىرىنە اسا قاتەر توندىرەتىن قىلمىستارعا قارسى جەدەل ارەكەت ەتەتىن «بۇركىت» ارنايى جاساعى تۋرالى فيلم پروكاتقا شىقتى.


كينوكارتينا مادەنيەت جانە اقپارات مينيسترلىگىنىڭ تاپسىرىسىمەن ۇلتتىق كينونى قولداۋ مەملەكەتتىك ورتالىعىنىڭ قارجىلاندىرۋىمەن تۇسىرىلگەن، دەپ حابارلايدى Almaty-akshamy.kz.


كەشە الماتىدا ءفيلمنىڭ رەسمي تۇساۋكەسەرى ءوتتى. شاراعا اسكەري شەندىلەر، تانىمال شوۋ-بيزنەس وكىلدەرى، جۋرناليستەر جانە باسقا دا قوناقتار قاتىستى. كورسەتىلىمدى كينوورتالىقتىڭ باسقارما ءتوراعاسى قۇرمانبەك جۇماعالي اشتى.




«ءبىزدىڭ ورتالىق كورەرمەنگە وي سالار ساپالى جانە قىزىقتى فيلمدەردىڭ ەكرانعا شىعۋىنا مۇددەلى. ءقازىر مەملەكەتتىك قولداۋعا يە بولاتىن كينوجوبالاردى قارجىلاندىرۋ مەحنيزمدەرىن جەتىلدىرۋ، كونكۋرستى بارىنشا اشىق جانە ءادىل وتكىزۋ، كينەماتوگرافيستەرگە تۇسىنىكتى ەرەجەلەر جاساۋ باعىتىندا جۇمىستار جۇرگىزىپ جاتىرمىز. بۇنىڭ بارلىعى ءمينيسترىمىز ايدا عالىم قىزىنىڭ جەكە قاداعالاۋىندا»، -دەپ اتاپ ءوتتى قۇرمانبەك جۇماعالي.



ۇلتتىق كينونى قولداۋ مەملەكەتتىك ورتالىعى باسقارما ءتوراعاسىنىڭ ايتۋىنشا، قازىرگى كورەرمەندەردىڭ سۇرانىس، تالعامى جان-جاقتى. سوندىقتان، كورەرمەنگە ءارتۇرلى جانرداعى، وسىنداي ءتۇرلى تريۋكقا تولى ەكشن فيلمدەردى دە ۇسىنعان ءجون. فيلمدە «بۇركىت» ارنايى جاساعىنىڭ ساربازدارى «كۇرەڭ بەرەت» كيۋ قۇقىنا يە بولۋ ءۇشىن سىنعا تۇسەدى.



«ەلىمىزدە بۇگىنگى كۇنگە 200-گە جۋىق "كۇرەڭ بەرەت" يەگەرى بار ەكەن. كۇرەڭ بەرەت كيۋ مارتەبەسىنە ارنالعان بىلىكتىلىك سىناعىنان ءوتۋ – جاۋىنگەرلىك رۋحتىڭ بەلگىسى. سوندىقتان، جاڭا ءفيلمىمىز جاستاردى وتانعا دەگەن ادالدىق پەن رياسىز ماحابباتقا تاربيەلەيدى دەپ سەنەمىز» -  دەدى قۇرمانبەك جۇماعالي.



ءفيلمنىڭ رەجيسسەرى – دانيار يبراگيموۆ، ول ءۇشىن بۇل كارتينا دەبيۋتتىك جۇمىس. بۇعان دەيىن دانيار «قازبات» جانە «التىنشى بەكەت» اسكەري فيلمدەرىندە پروديۋسەر رەتىندە قىزمەت ەتكەن. سول سەبەپتى، تاجىريبەلى مامان تۋىندىنى ءتۇسىرۋ وعان قيىندىق تۋدىرماعانىن ايتتى.


فيلمگە داۋرەن سەرعازين، سانجار ءمادي، اسىلحان تولەپوۆ، گۇلناز جولانوۆا، اسەل ساعاتوۆا، جاندوس ايباسوۆ جانە ازامات ساتىبالدى سىندى ەلىمىزدىڭ تانىمال اكتەرلەرى ءتۇستى. سونىمەن بىرگە تانىمال مۋزىكانت عالىمجان مولدانازار دا انتاگونيست كەيىپكەردىڭ ءرولىن سومداپ شىقتى. باستى رولدەگى اكتەرلەر ءتۇسىرىلىم جۇمىستارىنا كىرىسپەس بۇرىن بىرنەشە اپتا بويى جاۋىنگەرلىك وقۋ-جاتتىعۋلارىنا قاتىسىپ، تاكتيكالاردى ۇيرەندى.




«فيلمگە ءتۇسۋ ءۇشىن ءبىز ارنايى نورماتيۆتەردى تاپسىردىق. شىنايى سارزبازداردان ەش ايىرماشىلىعىمىز بولمادى. 30 كەلىدەن اۋىر فورمانى كيىپ جۇردىك. ءبىر ەپيزودتىڭ ءتۇسىرىلىمى كەزىندە ارقامدى وڭباي جاراقاتتاپ الدىم. ءبىر اپتا بويى ەم الۋىما تۋرا كەلدى. ءوزىم كاسكادەر بولعاندىقتان – بارلىق تريۋكتەردى ءوزىم جاساۋعا تىرىستىم» - دەيدى فيلم اكتەرى سانجار ءمادي.




بۇل كينونىڭ تۇسىرىلىمىنە ارنايى جاساق، اسكەري تەحنيكا جانە اۆياسيا، سونداي-اق ەكى جۇزدەن استام بەلسەندى اسكەري قىزمەتشى قاتىسقان. جەدەل-ىزدەستىرۋ شارالارى ارقاۋ بولعان كارتينانىڭ كەيبىر ەپيزودتارى شىنايى وقيعالارعا نەگىزدەلگەن. ءتۇسىرىلىم جۇمىستارى الماتى وبلىسىنىڭ كورىكتى جەرلەرىندە، قونايەۆ قالاسىندا، ەسىك كولىنىڭ تاۋلارىندا جانە ىلە وزەنىندە ءوتتى.



«Burkit» ەكشن ءفيلمى 2 قاراشادان باستاپ بارلىق كينوتەاترلاردا قازاق جانە ورىس تىلدەرىندە شىعادى.


 

ءسىزدىڭ رەاكسياڭىز؟
ۇنايدى
0
ۇنامايدى
0
كۇلكىلى
0
شەكتەن شىققان
0
سوڭعى جاڭالىقتار

15:49

15:38

15:33

15:30

15:26

15:25

14:14

14:12

12:50

12:26

11:54

11:41

11:40

11:24

10:51

10:42

10:38

10:29

10:18

10:10

10:09

10:00

09:43

09:31

09:22