قار كوشكىنى جانە سۋ تاسقىنى بولۋى مۇمكىن.
قازاقستاننىڭ توتەنشە جاعدايلار ءمينيسترى يۋريي يلين ەلىمىزدە سۋ باسۋ ءقاۋپى بار وڭىرلەردى اتادى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«اقمولا، اقتوبە، شىعىس قازاقستان، باتىس قازاقستان، سولتۇستىك قازاقستان، قاراعاندى، قوستاناي جانە پاۆلودار وبلىسىندا تاياۋداعى اپتادا كۇن كۇرت جىليدى دەپ كۇتىلۋدە. سايكەسىنشە، بۇل قاردىڭ ەرۋى مەن سەڭ جۇرۋگە ىقپال ەتەدى. وسى ورايدا جوعارىدا اتالعان وڭىرلەرگە قاراستى 157 ەلدى مەكەندى سۋ باسۋ ءقاۋپى بار»، - دەدى يۋريي يلين ورتالىق كوممۋنيكاسيالار قىزمەتى الاڭىندا وتكەن باسپا ءسوز ءماسليحاتىندا.
سونداي-اق، مينيستر ەلىمىزدىڭ وڭتۇستىك وڭىرىندەگى جاعدايعا توقتالىپ ءوتتى.
«سونىمەن قاتار تۇركىستان وبلىسىنىڭ وڭتۇستىگى مەن تاۋ بوكتەرى اۋداندارىندا، جامبىل وبلىسىنىڭ سولتۇستىك-شىعىسىندا، وڭتۇستىگىندە، تاۋلى اۋداندارىندا، سول سياقتى الماتى وبلىسىنىڭ وڭتۇستىگىندە جانە تاۋلى اۋداندارىندا قاتتى جاۋىن-شاشىن كۇتىلۋدە. وسىعان بايلانىستى جوعارىدا اتالعان وڭىرلەردە قار كوشكىنى جانە سۋ تاسقىنى بولۋى مۇمكىن»، - دەيدى ول.
ۆەدومستۆو باسشىسىنىڭ ايتۋىنشا، اۋا رايىنىڭ قولايسىزدىعى سالدارىنان بولاتىن توتەنشە جاعدايدىڭ الدىن الۋ شارالارى كۇندەلىكتى ءجۇرىپ جاتىر جانە باقىلاۋدا.