قازاقستان رەسپۋبليكاسى سىرتقى ىستەر ءمينيسترىنىڭ ءبىرىنشى ورىنباسارى قايرات وماروۆ دۇنيەجۇزىلىك بانكتىڭ قازاقستانداعى تۇراقتى وكىلى اندرەي ميحنيەۆپەن كەزدەستى.
كەزدەسۋدە دۇنيەجۇزىلىك بانكتىڭ قازاقستانداعى قىزمەتىنىڭ پەرسپەكتيۆالارى، سونداي-اق ىنتىماقتاستىقتىڭ باسىمدىقتارى تالقىلاندى، دەپ حابارلايدى Almaty-akshamy.kz.
كەزدەسۋ بارىسىندا تاراپتار قازاقستاندا ەكونوميكانىڭ نەگىزگى سەكتورلارىندا ءبىرقاتار ينۆەستيسيالىق جوبالاردى ىسكە اسىرۋ پەرسپەكتيۆالارىنا توقتالدى.
ق.وماروۆ دۇنيەجۇزىلىك بانكپەن اراداعى ءتيىمدى ءارى ۇزاق مەرزىمدى ىنتىماقتاستىقتىڭ وڭ قارقىنىنا، سونداي-اق بانكتىڭ قازاقستاننىڭ الەۋمەتتىك-ەكونوميكالىق دامۋىنا قوسقان قۇندى ۇلەسىنە نازار اۋداردى. ول ينكليۋزيۆتى جانە تۇراقتى دامۋعا قول جەتكىزۋ ءۇشىن قازاقستاندا اسىرىلىپ جاتقان رەفورمالاردى قولداۋعا باعىتتالعان بانكتىڭ ەلىمىزبەن ءىس-قيمىلى جالعاساتىنىنا سەنىم ءبىلدىردى.
ءوز كەزەگىندە، ا.ميحنيەۆ دۇنيەجۇزىلىك بانك قازاقستاننىڭ ماڭىزدى سەرىكتەسى جانە 4 ميلليارد اقش دوللارىنان اساتىن 10 جوبانى بىرلەسىپ جۇزەگە اسىرۋ بويىنشا بەلسەندى جۇمىس ىستەپ جاتقانىن اتاپ ءوتتى. ونىڭ ايتۋىنشا، قازاقستان رەسپۋبليكاسىنىڭ پرەزيدەنتى قاسىم-جومارت توقايەۆ جاريالاعان رەفورمالاردى قولداۋ ماقساتىندا ءبىرقاتار جاڭا ينفراقۇرىلىمدىق جوبالار ازىرلەنۋدە.
جالپى، تاراپتار نەگىزگى سالالارداعى ىنتىماقتاستىقتى تەرەڭدەتۋگە ءوزارا مۇددەلىلىك تانىتتى.