قازاقستان ۇلتتىق بانكى سوت ءىسى مەن شەشىمدەرى اياسىندا جاسالعان «جەكە سوت ورىنداۋشىلارىنىڭ» جالعان قۇجاتىن ۇسىنۋ ارقىلى الدايتىن الاياقتاردىڭ جيىلەپ كەتكەنىن ەسكەرتەدى.
قاراجات جىمقىرۋدى كوزدەيتىن قاسكويلەر وزدەرىن جەكە سوت ورىنداۋشىسى رەتىندە تانىستىرىپ، ازاماتتارعا جالعان قۇجاتتار جىبەرەدى، دەپ حابارلايدى Almaty-akshamy.kz 24.kz-كە سىلتەمە جاساپ.
وندا ازاماتتارعا تيەسىلى ۇلتتىق بانكتە «جەكە تۇلعالاردىڭ اشىق جانە ساقتاندىرىلعان شوتى» بار دەپ الدايدى. سول ءۇشىن جابىرلەنۋشى تاراپ رەتىندە ازاماتتارعا اقشالاي تولەمدەر مەن وتەماقىلار تولەنەدى دەگەن سىلتاۋمەن كەيىن «ۇلتتىق بانكتىڭ قاراجاتىنان» وتەلەدى دەپ ساقتاندىرۋ جارناسىن ەنگىزۋ كەرەك ەكەنىن العا تارتادى – دەلىنگەن حابارلامادا.
ازاماتتاردى سەندىرۋ ءۇشىن مەملەكەتتىك ورگاندارداعى «ۋاكىلەتتى تۇلعالاردىڭ» نەمەسە جەكە سوت ورىنداۋشىسىنىڭ قولى مەن ءاتى-جونى جازىلعان جانە ءمور باسىلعان جالعان قۇجاتتاردى كورسەتەدى. مۇنداي «راستاۋشى قۇجاتتار» ازاماتتاردى ءۇشىنشى تۇلعاعا اقشا اۋدارۋعا سەندىرۋ ءۇشىن كورسەتىلەدى. ۇلتتىق بانك جەكە تۇلعالاردىڭ شوتىنا قىزمەت كورسەتپەيتىنىن، ازاماتتاردىڭ قارجى قۇرالدارىن ساقتاندىرۋمەن اينالىسپايتىنىن، سونداي-اق حالىقپەن اقشالاي ەسەپ ايىرىسپايتىنىن ەسكە سالامىز. ەگەر ءسىز نەمەسە جاقىنىڭىز الاياقتاردىڭ ارباۋىنا تاپ بولسا، ءتيىستى ارىزبەن قازاقستان رەسپۋبليكاسىنىڭ قۇقىق قورعاۋ ورگاندارىنا جۇگىنۋگە كەڭەس بەرەمىز – دەيدى ۇلتىق بانك وكىلدەرى.
كەڭەس الۋ ءۇشىن ۇلتتىق بانكتىڭ 1477 قىسقا ءنومىرلى بايلانىس ورتالىعىنا حابارلاسۋعا بولادى.