قوستاناي وبلىسىنىڭ اكىمى قۇمار اقساقالوۆ سۋ تاسقىنىنا قارسى ءىس-شارالار بويىنشا وبلىستىق شتابتىڭ وتىرىسىن وتكىزدى.
وتىرىستا ءوڭىر اكىمدەرىنىڭ مەملەكەت باسشىسىنىڭ تاپسىرمالارىن ورىنداۋ جانە سۋ تاسقىنىنا قارسى ىس-ارەكەتتەرىن كۇشەيتۋگە باعىتتالعان جۇمىستارى تۋرالى باياندامالارى تىڭدالدى. كەڭەس بارىسىندا قۇمار اقساقالوۆ اكىمدەر مەن كۇش قۇرىلىمدارىنا ءبىرقاتار ناقتى تاپسىرما بەردى، دەپ حابارلايدى Almaty-akshamy.kz.
«قازىرگى ۋاقىتتا سۋ جوعارعى توبىل جانە قاراتومار سۋ قويمالارىنىڭ ەرنەۋىنەن استى. بىرەر كۇننەن كەيىن قاراتومار سۋ قويماسى تاسۋى ىقتيمال. سەكۋندىنا 250 تەكشە مەتردەن استام سۋ جۇرگەن جاعدايدا تومەن جاتقان ەلدى مەكەندەردى سۋ باسۋ ءقاۋپى باسىم. اتاپ ايتقاندا، رۋدنىي قالاسىنا قاراستى پەرسيەۆ سەلوسى، ب. مايلين اۋدانىنىڭ يۋبيلەينىي كەنتى، قوستاناي قالاسىنداعى باقشا قوعامدارى جانە قوستاناي اۋدانىنىڭ توبىل وزەنىنە جاقىن اۋماقتاردىڭ شەتكى كوشەلەرىنە ءقاۋىپ ءتونىپ تۇر.
وسىعان بايلانىستى تۇرعىنداردى مۇلكىمەن، ءتورت تۇلىگىمەن ەۆاكۋاسيالاۋ بويىنشا بارلىق قاجەتتى شارالاردى قابىلداۋدى تاپسىرامىن. بارلىق اۋدان جانە قالا اكىمدەرىنە بۇعان باسىمەن جاۋاپ بەرەتىنىن ەسكە سالامىن. سۋ تاسقىنىنا قارسى ءىس-شارالار كەشەندى تۇردە جۇزەگە اسىرىلۋى ءتيىس.
قازىرگى جاعدايعا دايار بولۋىمىز قاجەت. وڭتۇستىك وڭىرلەردەگىدەي ەمەس، ءبىزدىڭ بۇگىنگى جاعدايعا تولىقتاي دايارلاناتىن مەرزىمىمىز بولدى، ءالى دە 1-2 كۇن ۋاقىتىمىز بار. بىرەۋ مۇلكىن جوعالتسا، ءۇيىن نەمەسە كوممەرسيالىق نىسانىن سۋ باسسا، جاۋاپتىلارعا قاتاڭ شارا قولدانىلاتىن بولادى»، دەدى وبلىس اكىمى.