بۇگىن قازاقستان مەن ازەربايجاننىڭ ۇلتتىق كىتاپحانالارى اراسىندا ىنتىماقتاستىق تۋرالى مەموراندۋمعا قول قويۋ ءراسىمى ءوتتى.
قۇجات - كىتاپحانالىق-اقپاراتتىق قىزمەتتى ودان ءارى دامىتۋ، حالىقارالىق جازبا ادەبيەتتەردى الماسۋ جانە ەكى ەل اراسىنداعى مادەني بايلانىستاردى نىعايتۋعا نەگىز بولادى، دەپ حابارلايدى aqshamnews.kz مادەنيەت جانە اقپارات مينيسترلىگىنە سىلتەمە جاساپ.
ءىس-شارانىڭ ماڭىزدى ساتتەرىنىڭ ءبىرى – ازەربايجان ادەبيەتى بۇرىشىنىڭ اشىلۋى. ادەبي بۇرىشتا كلاسسيكالىق جانە زاماناۋي ادەبيەتتىڭ 250-دەن استام باسىلىمى، ەل مەملەكەتتىلىگىنىڭ قالىپتاسۋ تاريحى، ازەربايجان حالقىنىڭ سالت-داستۇرلەرى مەن ادەت-عۇرىپتارى تۋرالى شىعارمالار ۇسىنىلعان. سونىڭ ىشىندە اقىن جانە ويشىل مۇحاممەد فيزۋلي، مىرزا فاتالي احۋندوۆ، گۋسەين دجاۆيدي، جازۋشى انار كىتاپتارى جانە تاعى دا باسقا تانىمال تۇلعالاردىڭ تۋىندىلارى بار.
سونداي-اق ازەربايجاننىڭ حالىق جازۋشىسى ەلميرا احۋندوۆانىڭ گەيدار الييەۆ پەن اكادەميك زاريفا الييەۆانىڭ 100 جىلدىعىنا ارنالعان «زاريفا جانە گەيدار الييەۆتەر. ماڭگىلىك ماحاببات» كىتابىنىڭ تانىستىرىلىمى ءوتتى.
كىتاپتا اۆتور ءوز كەيىپكەرلەرىنىڭ بالالىق شاقتان ەرەسەك جاسقا دەيىنگى بۇكىل ءومىر جولىن بايانداپ، ولاردىڭ جەكە ءومىرى، بالا تاربيەسى جانە اتالعان كورنەكتى جۇپتىڭ باسىنا تۇسكەن سىناقتارى تۋرالى اڭگىمەلەيدى.
سالتاناتتى شاراعا ازەربايجان مادەنيەت ءمينيسترى اديل كەريملي، ق ر مام ارحيۆ، قۇجاتتاما جانە كىتاپ ءىسى كوميتەتى ءتوراعاسىنىڭ ورىنباسارى روللان قۇسپان، تۇركى مادەنيەتى مەن مۇراسى قورىنىڭ پرەزيدەنتى اقتوتى رايىمقۇلوۆا، ازەربايجان ۇلتتىق كىتاپحاناسىنىڭ باس ديرەكتورى كەريم تاحيروۆ، شەتەلدىك ديپلوماتيالىق ميسسيالاردىڭ وكىلدەرى، قازاقستاننىڭ عىلىمي جانە شىعارماشىلىق زيالىلارى، جوو ستۋدەنتتەرى مەن ماگيسترانتتارى قاتىستى.