جەتىسۋ وبلىسىنىڭ "كوكتال" پوليگونىندا "التىن قىران-2024" حالىقارالىق تاكتيكالىق-ارنايى وقۋ-جاتتىعۋى اياقتالدى.
بەلسەندى كەزەڭ بارىسىندا قازاقستاندىق دەسانتشىلار مەن ازەربايجان ارمياسىنىڭ اسكەري قىزمەتشىلەرىنەن قۇرالعان بىرىككەن جاساق زاڭسىز قارۋلى قۇرالىمنىڭ اۆتوموبيل تەحنيكاسىنىڭ لەگىنە توسقاۋىل ۇيىمداستىردى، دەپ حابارلايدى aqshamnews.kz
ءىس-قيمىلدىڭ پراكتيكالىق كەزەڭىن قازاقستان مەن ازەربايجان قارۋلى كۇشتەرى باس شتابتارىنىڭ باستىقتارى گەنەرال-لەيتەنانت سۇلتان كامالەتدينوۆ پەن گەنەرال-پولكوۆنيك كەرىم ۆەلييەۆ قاداعالادى.
ەكى ەل قارۋلى كۇشتەرى باسشىلىعىنىڭ نازارى بارلاۋ جاساقتارىنىڭ ارەكەتتەرىنە، باسىپ الۋ جانە اتىسپەن قامتاماسىز ەتۋ توپتارىنا جانە ۇشقىشسىز ۇشۋ اپپاراتتارى ارقىلى بارلاۋ دەرەگىن الۋ الگوريتمىنە اۋدارىلدى.
وقۋ-جاتتىعۋ بارىسىندا كونتينگەنتتەردى ۇيلەستىرۋ جوعارى دەڭگەيگە جەتتى. بىرىككەن بارلاۋ جاساعىنىڭ كومانديرى قارسىلاس وتەدى دەگەن بارلىق باعىتتاردى تالداپ، اۆتوموبيل كولىگى ءجۇرۋى قيىن بولاتىن ايماقتى تاڭداپ، اتىس نۇكتەلەرىنىڭ ورنالاسۋى مەن ولاردى جاسىرۋ ماسەلەلەرىن پىسىقتادى. قابىلدانعان شەشىمدەردىڭ دۇرىستىعى ۇيىمداسقان توسقاۋىلدىڭ ءتيىمدى جانە تاپسىرمانىڭ ناقتى ورىندالۋىن قامتاماسىز ەتتى.
"التىن قىران-2024" حالىقارالىق تاكتيكالىق-ارنايى وقۋ-جاتتىعۋى ءتاۋلى-شولدى جەرلەردە ارنايى بارلاۋ ءىس-قيمىلدارىن كورسەتۋمەن اياقتالدى. ءبىز كوماندالىق قۇرامنىڭ دايارلىعىنىڭ، اسكەري قىزمەتشىلەردىڭ دەنە دايىندىعىنىڭ، ەكى ەلدىڭ كونتينگەنتى اراسىنداعى ءوزارا ءىس-قيمىل دەڭگەيىنىڭ جوعارى ەكەنىنە كوز جەتكىزدىك. بولىمشە كومانديرلەرى وتە قىسقا مەرزىمدە ءبىرتۇتاس ورگانيزم رەتىندە ارەكەت ەتكەن جەكە قۇرامنىڭ ۇيلەسىمدىلىگىنە قول جەتكىزدى. بۇعان وقۋ-جاتتىعۋدىڭ بارلىق كەزەڭىندە قازاقستاندىق جانە ازەربايجاندىق اسكەري قىزمەتشىلەرمەن قاتار مىندەتتەردى اتقارعان بىرىككەن جاساقتاردىڭ ارقاسىندا قول جەتكىزىلدى، – دەپ اتاپ ءوتتى وقۋ-جاتتىعۋ جەتەكشىسى قازاقستان رەسپۋبليكاسى قارۋلى كۇشتەرى دەسانتتىق-شابۋىلداۋ اسكەرلەرىنىڭ قولباسشىسى گەنەرال-مايور الماز جۇماكەيەۆ.
بەلسەندى كەزەڭنەن كەيىن بىردەن وقۋ-جاتتىعۋدىڭ جابىلۋ سالتاناتى ءوتتى، وندا ەرەكشە كوزگە تۇسكەن اسكەري قىزمەتشىلەر ەكى ەلدىڭ اسكەري كونتينگەنتتەرى قولباسشىلىعىنىڭ العىس حاتتارىمەن ماراپاتتالدى.