ق ر قارۋلى كۇشتەرى ۇلتتىق اسكەري-پاتريوتتىق ورتالىعى «جاس سارباز» بالالار ستۋدياسىنىڭ بي ۇجىمى كوكشەتاۋ قالاسىندا وتكەن ۇلتتىق دەلفيي ويىندارىندا جوعارى ماراپاتقا يە بولدى.
دەلفيي ويىندارىنا 600 جاس دارىن قاتىستى. قازىلار القاسىنىڭ تارازىسىنا 20 حورەوگرافيالىق ۇجىمنىڭ كومپوزيسيالارى ۇسىنىلدى. ولاردىڭ ىشىندە 8 جاستان 10 جاسقا دەيىنگى ساناتتا «جاس سارباز» بالالار ستۋدياسىنىڭ بي توبى «حالىق ءبيى» نوميناسياسىندا «التىن» جۇلدە ەنشىلەدى، دەپ حابارلايدى aqshamnews.kz قورعانىس مينيسترلىگىنە سىلتەمە جاساپ.
جاس بيشىلەر شىعارماشىلىق بايقاۋعا پەداگوگ-حورەوگراف، ءۇشىنشى سىنىپتى سەرجانت الميرا اسىلبەكوۆا مەن قويۋشى-حورەوگراف، قارۋلى كۇشتەردىڭ قىزمەتكەرى ەرجان قۇدايبەرگەنوۆتىڭ باسشىلىعىمەن مۇقيات دايىندالدى.
– بالالاردىڭ بيمەن اينالىسقانىنا نەبارى ەكى جىل. سونىڭ وزىندە قىرعىزستانداعى «نارەستە» حالىقارالىق فولكلورلىق فەستيۆالىندە قازاقستاننىڭ اتىنان ونەر كورسەتتى. ەندى بىشكەكتە وتەتىن حالىقارالىق دەلفيي ويىندارىنا بارادى. بۇل جەتىستىك، ارينە، ءبارىمىزدى شابىتتاندىرىپ، قۋانتتى. قورعانىس مينيسترلىگىنىڭ باسشىلىعىنا جانە تاربيەلەنۋشىلەرىمىزدىڭ شىعارماشىلىق الەۋەتىن دامىتۋعا ۇلكەن ۇلەس قوسقان اتا-انالارىنا راحمەت، – دەدى بالالار ستۋدياسىنىڭ جەتەكشىسى الميرا اسىلبەكوۆا.
وتكەن جەكسەنبىدە بايقاۋ جەڭىمپازدارىن اسكەري وركەستر قارسى الدى. جاس بيشىلەردى قۇتتىقتاۋعا ءۇاپو باسشىلىعىنىڭ وكىلدەرى، وقۋشىلاردىڭ اتا-انالارى مەن دوستارى كەلدى.