قازاقستان رەسپۋبليكاسىنىڭ ۇكىمەتى 2025 جىلدىڭ 13 ناۋرىزىنان باستاپ التى ايعا مالدىڭ رەپرودۋكتيۆتى توبىن – ءىرى قارا مەن ۇساق قارانى شەتەلگە شىعارۋعا تىيىم سالۋدى ۇزارتادى. بۇل تۋرالى aqshamnews.kz حابارلايدى اۋىل شارۋاشىلىعى مينيسترلىگىنە سىلتەمە جاساپ.
مينيسترلىك وسى ماسەلەگە بايلانىستى ارنايى قاۋلى جوباسىن ازىرلەپ، ونى "اشىق نقا" پورتالىندا جاريالاپ، قوعامدىق تالقىلاۋعا 20 ناۋرىزعا دەيىن شىعاردى.
«قازاقستان رەسپۋبليكاسىنىڭ اۋماعىنان ءىرى قارا جانە ۇساق قارانىڭ رەپرودۋكتيۆتى توبىن (ماتوچنوە پوگولوۆە) شىعارۋعا تىيىم سالۋ مەرزىمى التى ايعا ۇزارتىلسىن» دەلىنگەن قۇجاتتا.
اۋىل شارۋاشىلىعى مينيسترلىگىنىڭ مالىمەتتەرى بويىنشا، 2025 جىلدىڭ 1 قاڭتارىنا دەيىن قازاقستاندا ءىرى قارا مالدىڭ جالپى سانى 7 842،6 مىڭ باستى قۇراپ، وتكەن جىلدىڭ وسى كەزەڭىمەن سالىستىرعاندا 18،5%-عا ارتقان. ونىڭ ىشىندە، ءىرى قارانىڭ انالىق باسى 4 380 مىڭ باس نەمەسە 19،7%-عا وسكەن.
2024 جىلدىڭ سوڭىنا قاراي قازاقستاندا 430 مىڭ توننا ءىرى قارا ەتى ءوندىرىلدى، بۇل 2023 جىلمەن سالىستىرعاندا 7،5%-عا كوپ (399،3 مىڭ توننا). ال ۇساق قارا مالدىڭ سانى 18 522،6 مىڭ باستى قۇراپ، وتكەن جىلمەن سالىستىرعاندا 9،2%-عا وسكەن. سونىمەن قاتار، رەسپۋبليكادا 132،8 مىڭ توننا قوي ەتىن وندىرگەن.
مينيسترلىك سونداي-اق، 2025 جىلدىڭ 1 قاڭتارىنا دەيىن قازاقستاندا 213 ەت وڭدەيتىن كاسىپورىن جۇمىس ىستەپ، ولاردىڭ جالپى قۋاتى جىلىنا 412 مىڭ توننا ەتتى (قۇس ەتىن قوسپاعاندا) قۇرايتىنىن اتاپ ءوتتى. 2024 جىلى ءىرى جانە ۇساق قارا مالدى وڭدەۋ كولەمى 270 مىڭ تونناعا جەتتى، بۇل 2023 جىلمەن سالىستىرعاندا 17%-عا كوپ (230 مىڭ توننا).
اۋىل شارۋاشىلىعى مينيسترلىگى تىيىمنىڭ ۇزارتىلۋىنا بايلانىستى كەلەسى سەبەپتەردى العا تارتتى: كورشى ەلدەردە ءىرى قارا مەن ۇساق قارا مالعا جوعارى سۇرانىس بايقالادى، بۇل ءوز كەزەگىندە شەتەلگە مال شىعارۋدىڭ ارتۋىنا ىقپال ەتەدى. ال بۇل جاعداي قازاقستاننىڭ مال شارۋاشىلىعى مەن ەت ونىمدەرىن وڭدەۋ سالاسىنىڭ دامۋىنا كەرى اسەرىن تيگىزۋى مۇمكىن.
قازاقستاندا مالدى شەتەلگە شىعارۋ تىيىمى 2022 جىلدان بەرى كۇشىندە.