الماتى قالاسىندا جاڭا جاستار تەاترى بوي كوتەرمەك. بۇل تۋرالى قالا اكىمى ەربولات دوسايەۆ مالىمدەدى، دەپ حابارلايدى Aqshamnews.kz.
جاڭا مادەني نىسان ورتالىق ستاديوننىڭ جوعارعى جاعىندا ورنالاساتىن بولادى. بۇعان دەيىن بۇل اۋماقتا قاراۋسىز قالعان سكۆەر بار ەدى. بوستاندىق اۋدانىنىڭ تۇرعىنى اكىمگە وسى ماسەلە بويىنشا ءوتىنىش ءبىلدىرىپ، سكۆەردىڭ ساقتالۋىن جانە ونى قۇرىلىسقا بەرمەۋدى سۇراعان.
اكىمنىڭ ايتۋىنشا، بۇل جەر قالانىڭ مەنشىگىنە الىنعان جانە مۇندا جاستار تەاترىمەن بىرگە ارنايى قوعامدىق سكۆەر دە سالىنادى. سونىمەن قاتار، جەر سىلكىنىسى كەزىندەگى جينالۋ ورنى رەتىندە قاراستىرىلىپ، بارلىق قاجەتتى ينفراقۇرىلىم ەسكەرىلەدى.
"جاستار تەاترىنىڭ جانىندا ارنايى تەاترالدىق الاڭ بولادى، وندا تۇرعىندار جينالا الادى. ءبىز ادامداردىڭ قاۋىپسىزدىگىن ەسكەرىپ، ەۆاكۋاسيا جولدارى مەن جينالۋ ورىندارىنىڭ سانىن ەسەپتەدىك. جوبا تولىق دايىن، ءبىز ونى جاقىندا حالىققا تانىستىرامىز"، – دەدى ەربولات دوسايەۆ.
الماتى تۇرعىندارى ءۇشىن جاڭا جاستار تەاترى مادەني ءومىردى جانداندىراتىن ماڭىزدى جوبا بولماق. سونىمەن قاتار، قالا باسشىلىعى قوعامدىق كەڭىستىكتەردى ساقتاۋ مەن دامىتۋعا ەرەكشە كوڭىل ءبولىپ وتىرعانىن كورسەتتى.