الماتى قالاسىنىڭ تۇرعىندارى ءۇشىن كىتاپ وقۋ بۇرىنعىدان دا قولجەتىمدى بولا ءتۇستى. قالادا مۇمكىندىگى شەكتەۋلى ازاماتتارعا كىتاپتاردى تەگىن جەتكىزۋ بويىنشا پيلوتتىق جوبا ىسكە قوسىلدى. بۇل تۋرالى Aqshamnews.kz سايتى حابارلايدى.
قازىرگى ۋاقىتتا جوباعا 28 كىتاپحانا قاتىسۋدا، ال تاپسىرىس بەرۋ پروسەسى ونلاين جۇزەگە اسىرىلادى. وقىرمان الماتى كىتاپحانالارىنىڭ سايتىنان قالاعان كىتابىن تاڭداپ، ارنايى انكەتانى تولتىرىپ، مۇمكىندىگى شەكتەۋلى ەكەنىن راستايتىن قۇجاتتى تىركەۋى كەرەك. تاپسىرىس 1–2 كۇن ىشىندە وڭدەلىپ، وقىرماننىڭ ۇيىنە ياندەكس Go سەرۆيسى ارقىلى جەتكىزىلەدى.
الماتى كىتاپحانالارىنىڭ ديرەكتورى مەيرام بەكتەمبايەۆتىڭ ايتۋىنشا، بۇل باستاما قالانىڭ كىتاپ قورىنىڭ قولجەتىمدىلىگىن ارتتىرىپ، مۇمكىندىگى شەكتەۋلى جاندارعا كىتاپحانا قىزمەتىن پايدالانۋعا مۇمكىندىك بەرەدى.
"قازىرگى كەزەڭدە بۇل قىزمەتتى تەك مۇمكىندىگى شەكتەۋلى ازاماتتار ءۇشىن تەگىن ۇسىنىپ وتىرمىز. جاز ايلارىنا قاراي بارلىق قالا تۇرعىندارىنا قىزمەت كورسەتۋ مۇمكىندىگىن قاراستىرامىز، ءبىراق بۇل جاعدايدا جەتكىزۋ اقىلى بولادى"، – دەدى بەكتەمبايەۆ.
Yandex Qazaqstan كومپانياسى دا جوبانى قولداپ، ونىڭ باستى ماقساتى – ادامداردىڭ ءومىرىن جەڭىلدەتۋ ەكەنىن اتاپ ءوتتى.
"ءبىز سيفرلىق قىزمەتتەردى دامىتامىز، ءبىراق باستى نازارىمىز – ادامدار مەن ولاردىڭ قاجەتتىلىكتەرى. ەگەر وسى قىزمەت ارقىلى كىتاپتاردى قولجەتىمدى ەتە الساق، وندا بۇل ءبىزدىڭ باستى ماقساتتارىمىزدىڭ ءبىرى – تەحنولوگيالار ارقىلى ادامداردىڭ ءومىرىن جاقسارتۋ ەكەنىن كورسەتەدى"، – دەدى ياندەكس Go دوستاۆكا سەرۆيسىنىڭ جەتەكشىسى ەرجان بازارباي.
پيلوتتىق جوبا 2025 جىلدىڭ مامىر ايىنىڭ سوڭىنا دەيىن جالعاسادى. ەگەر باستاما سۇرانىسقا يە بولسا، ونى باسقا ساناتتاعى ازاماتتارعا دا كەڭەيتۋ مۇمكىندىگى قاراستىرىلادى.