الماتى قالاسىندا قازاقستان كاسىپقوي بوكس فەدەراسياسىنىڭ (قكبف) 8ء-شى ەسەپ بەرۋ-سايلاۋ كونفەرەنسياسى ءوتتى.
ءىس-شارا بارىسىندا راقىمجان ەردەنبەكوۆ قازاقستان كاسىپقوي بوكس فەدەراسياسىنىڭ پرەزيدەنتى بولىپ سايلاندى، بۇعان دەيىن فەدەراسيانى باسقارعان ۆيكتور دەميانەنكو ەندى پرەزيدەنتتىڭ كەڭەسشىسى قىزمەتىن اتقاراتىن بولىپ شەشىلدى. سونداي-اق، قازاقستان كاسىپقوي بوكس فەدەراسياسىنىڭ ۆيسە-پرەزيدەنتى قىزمەتىنە سۋرەن تونويان مەن دانيار جىلقىبايەۆ سايلاندى.
قازاقستان كاسىپقوي بوكس فەدەراسيا كوميسسياسىنىڭ قۇرامى دا وزگەردى. اتقارۋ كوميتەتىنىڭ مۇشەسى سۇلتان ساتبايەۆ سوت كوميسسياسىنىڭ ءتوراعاسى بولدى. زاڭ كوميسسياسىنىڭ جانە اتقارۋ كوميتەتىنىڭ مۇشەسى بولىپ باقىتبەك بەگالييەۆ سايلاندى.
سونداي-اق، ەسەپ بەرۋ-سايلاۋ كونفەرەنسياسىندا بيىل تولىقتاي ىسكە قوسىلاتىن Green Belt WBC Amateur Kazakhstan سەرپىندى جوباسىنىڭ جەتىستىگى ەرەكشە اتالىپ ءوتتى. سونىمەن قاتار 2020-2023 جىلدار ارالىعىنداعى اتقارىلعان جۇمىستار تۋرالى ەسەپ جاريالانىپ، الداعى ءۇش جىلعا فەدەراسيانىڭ ستراتەگيالىق دامىتۋ جوسپارلارى تالقىلاندى.