قازاقستان «جاسىل ەكونوميكاعا» كوشۋدە
ۇلتتىق ەكونوميكا مينيسترلىگى: قازاقستان «جاسىل ەكونوميكاعا» كوشۋ بويىنشا ءىس-قيمىلداردى دايەكتى تۇردە ىسكە اسىرۋدا، دەپ حابارلادى Almaty-akshamy.kz.
قازاقستان رەسپۋبليكاسى مەن ەۋروپالىق وداق مەملەكەتتىك ورگاندارى وكىلدەرىنىڭ قاتىسۋىمەن وتكىزىلگەن «تۇراقتى بولاشاقتى قالىپتاستىرۋ» ECOJER حالىقارالىق كونگرەسى بارىسىندا ق ر ۇلتتىق ەكونوميكا ۆيسە-مينيسترى الىبەك قۋانتىروۆ «جاسىل ەكونوميكاعا» كوشۋ بويىنشا قابىلدانىپ جاتقان شارالار تۋرالى باياندادى.
ۆيسە-مينيستر ءوز سوزىندە 2013 جىلى قازاقستاندا «جاسىل ەكونوميكاعا» كوشۋدىڭ تۇجىرىمدامالىق شەڭبەرى قابىلدانىپ، ەلدىڭ 2050 جىلعا دەيىنگى ستراتەگيالىق دامۋ جوسپارى ىسكە قوسىلعانىن اتاپ ءوتتى.
ا.قۋانتىروۆتىڭ ايتۋىنشا، ۇكىمەت ەكونوميكانى جاسىل ەتۋگە بەلسەندى شارالار قابىلداۋدا، بۇل «دوڭگەلەك ەكونوميكاعا» جوسپارلى كوشۋدى جۇزەگە اسىرۋعا مۇمكىندىك بەرەدى.
«2020 جىلعى جەلتوقساندا مەملەكەت باسشىسى 2020 جىلعى كليماتتىق امبيسيالار ءسامميتى كەزىندە قازاقستاننىڭ 2060 جىلعا قاراي كومىرتەگى بەيتاراپتىعىن قامتاماسىز ەتۋ جونىندەگى مىندەتتەمەسىن جاريالادى. 2021 جىلعى اقپاندا ەكى نەگىزگى قۇجات قابىلداندى: مەملەكەتتىك جوسپارلاۋدىڭ جاڭا جۇيەسى جانە 2025 جىلعا دەيىنگى ۇلتتىق دامۋ جوسپارى»، - دەدى ا.قۋانتىروۆ.
ەلىمىزدىڭ ۇلتتىق جوسپارى تۋرالى ايتا كەلە، سپيكەر نەگىزگى باعىتتاردىڭ ءبىرى بارلىق وڭىرلەردىڭ تەڭگەرىمدى دامۋى بولىپ تابىلاتىنىن اتاپ ءوتتى. 3 500-دەن استام اۋىل جاڭا وڭىرلىك ستاندارت بويىنشا جاڭعىرتىلادى. بۇل اۋىلدىق وڭىرلەردىڭ دامۋىنا جاڭا سەرپىن بەرەدى. قۇرىلىس كولەمىن ۇلعايتۋ جانە تۇرعىن ءۇي ينفراقۇرىلىمىن جاقسارتۋ جالعاسادى. بۇل شارالاردىڭ بارلىعى ازاماتتاردىڭ، اسىرەسە وڭىرلەردەگى ءومىر ءسۇرۋ ساپاسىن جاقسارتۋعا، سونداي-اق جەرگىلىكتى بيزنەسمەندەردى قولداۋعا كومەكتەسەدى.
«حالىقارالىق قوعامداستىقتىڭ قولداۋىنا سۇيەنە وتىرىپ، ءبىز شىعارىندىلاردى ازايتۋ جانە ەكونوميكانى دەكاربونيزاسيالاۋ بويىنشا ۇزاقمەرزىمدىك ستراتەگيانى ازىرلەيمىز، بۇۇ كونك-گە (بىرىككەن ۇلتتار ۇيىمىنىڭ كليماتتىڭ وزگەرۋى تۋرالى نەگىزدەمەلىك كونۆەنسياسى) ۇلتتىق دەڭگەيدە ايقىندالاتىن ۇلەسىمىزدى جاڭارتامىز جانە كۇشەيتەمىز. ءبىز سونداي-اق شىعارىندىلاردىڭ سالدارىن جۇمسارتۋداعى كۇش-جىگەرىمىز ءۇشىن ماڭىزدى نەگىز بولىپ تابىلاتىن شىعارىندىلار ساۋداسى سحەماسىن جەتىلدىرۋدەمىز»، - دەدى ۇلتتىق ەكونوميكا ءمينيسترىنىڭ ورىنباسارى.
ءسوزىن قورىتىندىلاي كەلە، ۆيسە-مينيستر الەمدىك قوعامداستىقپەن تىعىز ىنتىماقتاستىق قاجەتتىگىن جانە بۇگىنگى كونفەرەنسيا «جاسىل ەكونوميكاعا» كوشۋ بويىنشا ىرگەلى ورتاق ماقساتقا باعىتتالعان ماڭىزدى قادامداردىڭ ءبىرى بولىپ تابىلاتىنىن اتاپ ءوتتى.
انىقتاما: نۇر-سۇلتاندا «ECOJER» – «تۇراقتى بولاشاقتى قالىپتاستىرۋ» ءبىرىنشى حالىقارالىق كونگرەسى وتكىزىلدى. ءىس-شارا قازاقستان تاۋەلسىزدىگىنىڭ 30 جىلدىعىن مەرەكەلەۋ شەڭبەرىندە دۇنيەجۇزىلىك قورشاعان ورتانى قورعاۋ كۇنى قارساڭىندا وتكىزىلدى. «ECOJER» كونگرەسىنىڭ ماقساتى - مەملەكەتتىك ورگانداردىڭ جوعارى جانە ورتا باسقارۋ بۋىنى، قارجى-ونەركاسىپتىك توپتار، تۇراقتى دامۋ سالاسىنداعى ەكو-بەلسەندىلەر مەن ساراپشىلار، «جاسىل» بيزنەس كومپانيالارى جانە حالىقارالىق دونور ۇيىمدار دەڭگەيىندەگى، مۇددەلى جۇرتشىلىقتىڭ ەكولوگيالىق مادەنيەتى مەن حاباردارلىعىن ارتتىرۋداعى كۇشتەرىن بىرىكتىرۋ؛ تۇراقتى دامۋ يدەياسىن ناسيحاتتاۋ.