تىيىم سالىنعان قىزمەت تۇرلەرىنىڭ ءتىزىمى انىقتالدى
2023 جىلدىڭ اقپان ايىنان باستاپ ءىرى ينۆەستورلار ءۇشىن قازاقستاندا جاڭا جوبالاردى ىسكە قوسۋ جانە قولدانىستاعى جوبالاردى جاڭعىرتۋ مۇمكىندىكتەرى ەداۋىر كەڭەيتىلدى، دەپ حابارلايدى Almaty-akshamy.kz ۇكىمەتكە سىلتەمە جاساپ.
ق ر پرەمەر-مينيسترى ءاليحان سمايىلوۆ «ينۆەستيسيانى مەملەكەتتىك قولداۋدى ىسكە اسىرۋدىڭ كەيبىر ماسەلەلەرى تۋرالى» ۇكىمەت قاۋلىسىنا ەنگىزىلگەن ءتيىستى تۇزەتۋلەرگە قول قويدى.
تۇزەتۋلەرگە سايكەس:
- ۇكىمەتپەن ينۆەستيسيالىق مىندەتتەمە تۋرالى كەلىسىم بەكىتۋدى جوسپارلاپ وتىرعان زاڭدى تۇلعالار ءۇشىن قىزمەتتىڭ باسىم تۇرلەرىنىڭ تىزبەسى الىنىپ تاستالدى. بۇل كەلىسىم بويىنشا 10 جىلعا دەيىنگى مەرزىمگە سالىق مولشەرلەمەسى بەلگىلەنەدى، ال ينۆەستور ونىڭ وتەۋى رەتىندە قوماقتى قاراجات سالۋعا، قانداي دا ءبىر ءوندىرىستى ىسكە قوسۋعا نەمەسە جاڭعىرتۋعا، قازاقستاندىق كادرلاردى وقىتۋعا جانە ت. ب. مىندەتتەلەدى.
- تىيىم سالىنعان قىزمەت تۇرلەرىنىڭ ءتىزىمى انىقتالدى. ياعني، ەندى ءىرى كومپانيا نەمەسە كاسىپكەر بۇل تىزىمگە ەنگىزىلمەگەن كەز كەلگەن ينۆەستيسيالىق باعىتتى ەركىن تاڭداپ، ۇكىمەتپەن ينۆەستيسيالىق مىندەتتەمەلەر تۋرالى كەلىسىم جاساي الادى.
تىيىم سالىنعاندار ساناتىنا:
- اكسيزدەلەتىن ونىمدەردىڭ كوتەرمە ساۋداسى جانە (نەمەسە) ءوندىرىسى
- لوتەرەيا وتكىزۋ
- ويىن بيزنەسى سالاسىنداعى قىزمەت جانە ت. ب. بارلىعى 14 تارماق جاتادى.
باسقا بارلىق باعىتتار بويىنشا شەكتەۋلەر جوق.