قازاقستان رەسپۋبليكاسى اۋىل شارۋاشىلىعى ءمينيسترى ايداربەك ساپاروۆ يراننىڭ قازاقستانداعى ەلشىسى الي اكبار دجوۋكارمەن كەزدەسۋ وتكىزدى.
تاراپتار اۋىل شارۋاشىلىعى سالاسىنداعى ەكىجاقتى ىنتىماقتاستىقتىڭ نەگىزگى باعىتتارىن تالقىلاپ، اۋىلشارۋاشىلىق ونىمدەرىنىڭ ءوزارا جەتكىزىلىمدەرىن كەڭەيتۋ ءۇشىن مۇمكىن بولاتىن قادامداردى انىقتادى.
ايداربەك ساپاروۆ قازاقستان مەن يران اراسىنداعى اۋىل شارۋاشىلىعى ونىمدەرىنىڭ ساۋداسى بويىنشا وڭ ديناميكانى اتاپ ءوتتى. 2025 جىلدىڭ العاشقى ەكى ايىنىڭ قورىتىندىسى بويىنشا ەكى ەل اراسىنداعى اوك ونىمدەرى ساۋداسىنىڭ كولەمى 72،4 ميلليون اقش دوللارىن قۇرادى، بۇل 2024 جىلدىڭ وسى كەزەڭىمەن سالىستىرعاندا 147،9%-عا ارتىق. قازاقستاننان جەتكىزىلەتىن نەگىزگى تاۋارلار اراسىندا ارپا، كۇنباعىس كۇنجاراسى، ۇساق جانە ءىرى قارا مال ەتى، وسىمدىك مايلارى، جۇگەرى، كوكونىستەر مەن بۇرشاق داقىلدارى بار.
«ءبىزدىڭ مىندەتىمىز — اۋىل شارۋاشىلىعى سالاسىنداعى ەكىجاقتى ساۋدانى ارتتىرۋدى جالعاستىرۋ. ماڭىزدى باعىتتاردىڭ ءبىرى — يرانعا استىق داقىلدارىن جەتكىزۋدى كەڭەيتۋ. سوڭعى 10 جىلدا قازاقستان سىزدەردىڭ نارىققا 9 ميلليون توننادان استام استىق، ونىڭ ىشىندە بيداي مەن ارپا ەكسپورتتادى. ءبىز بيداي ەكسپورتىن جىلىنا 2 ميلليون تونناعا دەيىن، ال ارپا ەكسپورتىن 1 ميلليون تونناعا دەيىن ارتتىرۋعا دايىنبىز»، — دەپ اتاپ ءوتتى مينيستر.
يران ەلشىسى، ءوز كەزەگىندە، اۋىل شارۋاشىلىعى سالاسىنداعى ىنتىماقتاستىقتى ودان ءارى نىعايتۋعا جانە ءوزارا جەتكىزىلىمدەردى بەلسەندەندىرۋگە قىزىعۋشىلىق ءبىلدىردى.
«ءبىز قازاقستانمەن ءوزارا ءىس-قيمىلدى تەرەڭدەتۋگە، اسىرەسە اۋىل شارۋاشىلىعى سالاسىندا جۇمىس ىستەۋگە ۇمتىلامىز. ءونىم جەتكىزىلىمدەرىن كەڭەيتۋ، استىق يمپورتىن ارتتىرۋ جانە بىرلەسكەن كاسىپورىندار قۇرۋ — بۇل ءبىزدىڭ ەل ءۇشىن باسىم مىندەتتەر»، — دەپ مالىمدەدى الي اكبار دجوۋكار.
ايداربەك ساپاروۆ بارلىق ۇسىنىلعان باستامالاردى قولداۋعا دايىن ەكەندىگىن راستادى.
كەزدەسۋ سوڭىندا تاراپتار قازاقستان مەن يران اراسىنداعى جۇمىس توبى اياسىندا سەرىكتەستىكتى نىعايتۋدى جالعاستىرۋ تۋرالى كەلىسىمگە كەلدى.