2021 جىلى قازاقستان IMD حالىقارالىق مەنەدجمەنتتى دامىتۋ ينستيتۋتىنىڭ جىل سايىنعى رەيتينگىندە 41-ورىن الدى
ق ر ۇلتتىق ەكونوميكا مينيسترلىگىنىڭ دەرەگىنشە، «IMD-2021 جىلعى رەيتينگتە قازاقستان ءوز پوزيسياسىن 3 تارماققا جانە 2020 جىلعى رەيتينگپەن سالىستىرعاندا 1،22 باللعا جاقسارتىپ، 54،22 بالدىق ناتيجەمەن 41-ورىن الدى»، - دەلىنگەن IMD حابارلاماسىندا، دەپ حابارلايدى Almaty-akshamy.kz
IMD تالانتتار رەيتينگى ءوزىنىڭ باسەكەگە قابىلەتتىلىگىن نىعايتۋ ءۇشىن تالانتتاردى دامىتۋ جانە تارتۋداعى ەكونوميكانىڭ الەۋەتىن كورسەتەدى. اعىمداعى جىلى قازاقستان رەيتينگتىڭ 2 فاكتورى بويىنشا ءوز پوزيسياسىن جاقسارتقان.
«تارتىمدىلىق» فاكتورى بويىنشا قازاقستان 8 پوزيسياعا جوعارىلاپ، 39-ورىنعا يە بولدى. بۇل قورىتىندى رەيتينگكە ايتارلىقتاي اسەر ەتتى. جاقسارۋ «ءومىر ءسۇرۋ قۇنىنىڭ يندەكسى» بويىنشا 3 ورىن، «جەكە تۇلعالاردان الىناتىن تابىس سالىعى» بويىنشا 7 ورىن، «شەتەلدىك جوعارى بىلىكتى كادرلار» بويىنشا 25 ورىن كورسەتكىشتەرى بويىنشا كۇشتى پوزيسيالارمەن تۇسىندىرىلەدى.
«دايىندىق» فاكتورى بويىنشا قازاقستان ءوز پوزيسياسىن 7 تارماققا جاقسارتىپ، 43-ورىن الدى. جاقسارۋ «جوعارى بۋىنداعى قۇزىرەتتى باسشىلار» بويىنشا 18-ورىن، «قارجىلىق داعدىلار» بويىنشا 29-ورىن، «حالىقارالىق تاجىريبە» كورسەتكىشى بويىنشا 29-ورىن كورسەتكىشتەرى بويىنشا كۇشتى پوزيسياعا قول جەتكىزۋمەن تۇسىندىرىلەدى.
قازاقستان ۆەنگريا (42 ورىن)، تايلاند (43 ورىن)، پولشا (45 ورىن)، ۋكراينا (46 ورىن)، رەسەي (47 ورىن)، چيلي (48 ورىن)، تۇركيا (53 ورىن) ءتارىزدى ەلدەردەن الدا. 2021 جىلعى زەرتتەۋگە 64 ەل قاتىسىپ وتىر.
رەيتينگ ادىستەمەسىنە سايكەس، ەكونوميكانىڭ كادرلىق رەزەرۆىنىڭ ساپاسىن باعالاۋ بىرنەشە فاكتورلارعا نەگىزدەلەدى. «تارتىمدىلىق» فاكتورى حالىقارالىق كادر رەزەرۆى وكىلدەرىن تارتۋمەن قاتار ەكونوميكانىڭ جەرگىلىكتى تالانتتاردى قانشالىقتى ساقتاپ وتىرعانىن كورسەتەدى. «دايىندىق» فاكتورى ەلدەگى قولجەتىمدى داعدىلار مەن قۇزىرەتتەردىڭ ساپاسىن باعالايدى.