الماتىدا «قازاقستان حالقىنا» قورى 11،9 ملرد تەڭگە كولەمىندەگى قايىرىمدىلىق جوبانى جۇزەگە اسىرۋدا
كەشە الماتىدا قالا اكىمىنىڭ ورىنباسارى اسەم ءنۇسىپوۆانىڭ، «قازاقستان حالقىنا» قورىنىڭ باسقارما ءتوراعاسى بولات جامىشيەۆتىڭ، قور ءتوراعاسىنىڭ ورىنباسارى ءلاززات شىڭعىسبايەۆانىڭ جانە قوعامدىق ۇيىمدار مەن جەرگىلىكتى اتقارۋشى ورگاندار وكىلدەرىنىڭ قاتىسۋىمەن «قازاقستان حالقىنا» قورىنىڭ قىزمەتى وڭىرلەر ءۇشىن» اتتى «دوڭگەلەك ۇستەل» ءوتتى.
قور ءتوراعاسىنىڭ ايتۋىنشا، بۇل باسقوسۋ ۇلتتىق قايىرىمدىلىق بويىنشا II كونفەرەنسيانىڭ اياسىندا ءوڭىردىڭ قايىرىمدىلىق باعدارلامالارى مەن جوبالارىن ىسكە اسىرۋ جونىندەگى باستامالاردى تالقىلاۋ مەن ايقىنداۋ ماقساتىندا ۇيىمداستىرىلعان. بولات جامىشيەۆ جيىندا «قازاقستان حالقىنا» قورىنىڭ جۇزەگە اسىرعان قايىرىمدىلىق باستامالارىنا كەڭىرەك توقتالىپ، الماتىدا ىسكە اسقان جانە جوسپارلانعان جوبالاردى تانىستىردى.
«قور قازاقستاندىقتاردىڭ دەنساۋلىق ساقتاۋ، ءبىلىم بەرۋ، الەۋمەتتىك قولداۋ، مادەنيەت جانە سپورت سالالارىنداعى نەگىزگى ماسەلەلەرىن شەشۋگە باعىتتالعان جالپى سوماسى 146،5 ملرد تەڭگە بولاتىن 40-تان استام قايىرىمدىلىق باعدارلاما مەن جوبانى قارجىلاندىرادى. سونداي-اق، توتەنشە جاعدايلار كەزىندە زارداپ شەككەن ازاماتتارعا كومەك كورسەتەمىز. الماتى قالاسىندا جالپى سوماسى 11 ملرد 944 ملن تەڭگەگە 12 قايىرىمدىلىق جوبا مەن باعدارلاما ىسكە اسىرىلۋدا. بۇگىنگى تاڭدا ونىڭ ىشىندە 4 ملرد 26 ملن تەڭگەدەن استام سوماعا كومەك كورسەتىلدى، قۇنى 7 ملرد 918 ملن تەڭگە بولاتىن جوبالاردى جۇزەگە اسىرۋ جوسپارلانعان»، – دەپ اتاپ ءوتتى بولات جامىشيەۆ.
دەنساۋلىق ساقتاۋ سالاسىندا الماتى قالاسىندا جالپى سوماسى 4،2 ملرد تەڭگەگە دارى-دارمەك ساتىپ الۋ جوسپارلانعان، ونىڭ ىشىندە ومىرگە ءقاۋىپ توندىرەتىن جانە ورفاندىق اۋرۋلارى بار 33 پاسيەنت ءۇشىن جالپى سوماسى 3،7 ملرد تەڭگەگە دارى-دارمەك ساتىپ الىندى. قوسىمشا 489،3 ملن تەڭگە سوماعا پرەپارات ساتىپ الۋ جوسپارلانعان. ءبىر ناۋقاس رف ەمدەۋگە جىبەرىلدى. تامىرلى پاتولوگياسى بار 4 بالاعا تەگىن مەديسينالىق كومەك كورسەتىلدى. ال شۇعىل تۇردە قاساڭ قابىقتى ترانسپلانتاسيالاۋعا مۇقتاج الماتىلىق 15 پاسيەنتكە كوزدىڭ قاساڭ قابىعى اۋىستىرىلدى.
سونداي-اق، بيىل قالادا ەرتە ارالاسۋ ورتالىعىن اشۋ جوسپارلانۋدا. ورتالىقتا نەيرو-ورتوپەديالىق بۇزىلىسى بار جانە 3 ايدان 3 جاسقا دەيىنگى بالالار كەشەندى وڭالتۋ كومەگىن الاتىن بولادى.
ونكولوگيالىق قىزمەتتى دامىتۋ شەڭبەرىندە «قازاق ونكولوگيا جانە راديولوگيا عىلىمي-زەرتتەۋ ينستيتۋتى» اق-نى جالپى سوماسى 6،9 ملرد تەڭگەگە جابدىقتارمەن جاراقتاندىرۋ جوسپارلانۋدا. بالالار نەيروحيرۋرگيالىق قىزمەتىن دامىتۋ ماقساتىندا «بالالار شۇعىل مەديسينالىق كومەك ورتالىعى»، №2 بالالار قالالىق كلينيكالىق اۋرۋحاناسى، پەدياتريا جانە بالالار حيرۋرگياسى عىلىمي ورتالىعىنا جالپى كولەمى 222،2 ملن تەڭگەگە جابدىقتار جەتكىزۋ جوسپارلانۋدا.
الەۋمەتتىك قولداۋ سالاسىندا قور الماتىنىڭ 15 تۇرعىنىنا جالپى سوماسى 133،2 ملن تەڭگەگە يننوۆاسيالىق پروتەزدەر، ال تىرەك-قيمىل اپپاراتى بۇزىلعان ءبىر بالاعا قۇنى 9 ملن تەڭگەگە ەكزوسكەلەت ساتىپ الدى.
ەرەكشە ءبىلىم بەرۋ قاجەتتىلىكتەرى بار بالالارعا ارنالعان ارنايى مەكتەپتەردى جاراقتاندىرۋ شەڭبەرىندە الماتىدا ورنالاسقان ەلىمىزدىڭ بارلىق ارنايى مەكتەپتەرىنىڭ جۇمىسىن ۇيلەستىرەتىن «ارنايى جانە ينكليۋزيۆتى ءبىلىم بەرۋدى دامىتۋدىڭ ۇلتتىق عىلىمي-پراكتيكالىق ورتالىعى» جاراقتاندىرىلدى. جالپى سوماسى 210،2 ملن تەڭگەگە 7 قالالىق ارنايى مەكتەپتى جابدىقتاۋ جوسپارلانعان.
الماتى قالاسى بويىنشا قوردىڭ ءبىلىم بەرۋ گرانتتارى باعدارلاماسى بويىنشا 35 جوو-دا حالىقتىڭ الەۋمەتتىك وسال توپتارىنان شىققان 860 ستۋدەنت وقيدى.
سونداي-اق، قور قايعىلى قاڭتار وقيعاسى بارىسىندا زارداپ شەككەن 684 ادامعا جالپى سوماسى 2،5 ملرد تەڭگەگە قايىرىمدىلىق كومەك كورسەتتى. ونىڭ ىشىندە الماتى قالاسى بويىنشا 247 زارداپ شەككەن ازاماتقا قولداۋ كورسەتىلدى.
الماتىدا قوردىڭ قولداۋىمەن ەرەكشە قاجەتتىلىكتەرى بار بالالارعا ارنالعان «جاس جاۋىنگەر» بەيىمدەۋ سپورتىنىڭ دەنە شىنىقتىرۋ-ساۋىقتىرۋ كلۋبى جۇمىس ىستەيدى. 10 پاراپورتسمەن ءۇشىن سپورتتىق-جۇگىرۋ پروتەزدەرى دايىندالدى، سونداي-اق مامىر ايىندا قالادا پارااتلەتتەرگە ارنالعان قر-داعى العاشقى جۇگىرۋ مەكتەبى ىسكە قوسىلدى.
كەزدەسۋ قورىتىندىسىندا الماتى قالاسى اكىمىنىڭ ورىنباسارى اسەم ءنۇسىپوۆا باستى مىندەت قالا تۇرعىندارىنىڭ ساپالى جانە قولجەتىمدى قىزمەتتەردى الۋدا جاڭا مۇمكىندىكتەرگە يە بولۋى ءۇشىن بارلىق جاعداي جاساۋ ەكەنىن اتاپ ءوتتى. وسىعان بايلانىستى قالا اكىمدىگى دەنساۋلىق ساقتاۋ، ءبىلىم بەرۋ جانە الەۋمەتتىك قولداۋ سالاسىنداعى جاڭا قايىرىمدىلىق جوبالاردى ىسكە اسىرۋ ءۇشىن قورمەن تىعىز جۇمىس ىستەۋگە اركەز دايىن.