ءبىرىنشى كەزەڭدە سيرەك كەزدەسەتىن اۋرۋلارعا كومەك كورسەتۋ باستالدى.
«قازاقستان حالقىنا» قورى ءتوراعاسىنىڭ ورىنباسارى ءلاززات شىڭعىسبايەۆا قوردىڭ كومەك كورسەتۋگە قانشا قارجى بولگەنىن ايتتى، دەپ حابارلايدى Almaty-akshamy.kz
«ءبىرىنشى كەزەڭدە سيرەك كەزدەسەتىن اۋرۋلارعا كومەك كورسەتۋدەن باستادىق. ونداي ناۋقاستار بۇرىن قازاقستاندا اقشا جيناپ، شەتەلدە ەم الاتىن. ەندى سونى قازاقستاندا ەمدەۋ ماسەلەسىن جولعا قويىپ جاتىرمىز. كلينيكا تابۋ كەرەك، دارىگەرلەر وعان دايىن بولۋى كەرەك، ونىڭ حاتتاماسىنا سايكەس كەلۋى كەرەك. جالپى، 24 بالا جانە 2 ەرەسەك ادامعا 9 ميلليارد تەڭگە كولەمىندە كومەك كورسەتىلەدى دەگەن شەشىم قابىلداندى. كەلىسىمشارت جاسالىپ جاتىر»، - دەدى ءتوراعا ورىنباسارى.
ايتۋىنشا، لوگيستيكا جاعىنان «فارماسيا» سك كومەك كورسەتەدى. مەديسينالىق پرەپاراتتار تىكەلەي زاۋىتتان كەلۋى ءۇشىن كەلىسىم جاسالىپ جاتىر. ودان بولەك قاڭتارداعى تارتىپسىزدىكتەر كەزىندە قايتىس بولعان ازاماتتاردىڭ وتباسىنا دا كومەك كورسەتىلەدى. الايدا وقيعالارعا قاتىستى تەكسەرۋ تولىق اياقتالعان سوڭ ناقتى قانشا ادامعا كومەك كورسەتىلەتىنى حابارلانادى.
بۇعان دەيىن «قازاقستان حالقىن» قوعامدىق قورى جاپپاي تارتىپسىزدىكتەر كەزىندە قازا تاپقان كۇش قۇرىلىمدارى قىزمەتكەرلەرى مەن بەيبىت تۇرعىنداردىڭ وتباسىلارىنا 7 ميلليون تەڭگەدەن اۋداراتىنىن حابارلادى.
ال اۋىر جاراقات العان اسكەري قىزمەتشىلەرگە، ىشكى ىستەر جانە ۇلتتىق قاۋىپسىزدىك ورگاندارى قىزمەتكەرلەرىنە، سونداي-اق جارالانعان بالالاردىڭ وتباسىنا 3 ميلليون تەڭگەدەن بولىنەدى.
سونداي-اق قور تارتىپسىزدىكتەر كەزىندە كەزدەيسوق قايتىس بولعان ادامداردىڭ تۋىستارىنا كومەك كورسەتەدى.