الماتى قالاسىنىڭ اكىمدىگى قازاقستان حالقى تىلدەرى كۇنى مەن احمەت بايتۇرسىن ۇلىنىڭ تۋعان كۇنىنە وراي «انا ءتىلىم – ارداعىم» اتتى مەرەكەلىك ءىس-شارا وتكىزدى.
ورتالىق دەمالىس ساياباعىندا ءوتكەن مەرەكەگە اقىندار مەن جازۋشىلار، ونەر قايراتكەرلەرى، ەڭبەك ارداگەرلەرى، ساياسي پارتيالار مەن ۇكىمەتتىك ەمەس ۇيىمداردىڭ وكىلدەرى، قالا تۇرعىندارى مەن قوناقتارى، ستۋدەنتتەر مەن وقۋشىلار قاتىستى.
- قازاقستان حالقى تىلدەرى كۇنى مەرەكەسى 2018 جىلدان بەرى ۇلتىمىزدىڭ ۇستازى احمەت بايتۇرسىن ۇلىنىڭ تۋعان كۇنىنە وراي تويلانادى. الماتىدا ا.بايتۇرسىن ۇلى ەسكەرتكىشىنە گۇل شوقتارى قويىلدى. ورتالىق دەمالىس ساياباعىندا مەرەكەلىك ءىس-شارا ۇيىمداستىرىلدى. كەشتە ەسترادا جۇلدىزدارى ونەر كورسەتىپ، كورەرمەندەرگە سۇراق-جاۋاپ تۇرىندە ويىندار وتكىزىلدى. “جاڭا عاسىر” تەاترى قويىلىم قويدى، - دەدى الماتى قالاسى اكىمىنىڭ اپپاراتى تىلدەردى دامىتۋ جانە ونوماستيكا ءبولىمىنىڭ باسشىسى باقىت قالىمبەت.
سونداي-اق مەرەكەلىك كەش اياسىندا الماتى قالاسىندا مەملەكەتتىك ءتىل ساياساتىن جۇزەگە اسىرۋعا اتسالىسىپ جۇرگەن مەملەكەتتىك قىزمەتكەرلەر مەن قوعام بەلسەندىلەرى عىلىم جانە جوعارى ءبىلىم ءمينيسترىنىڭ العىس حاتىمەن ماراپاتتالدى.
- ءبىز ەكى جارىم جىلدان بەرى قازاق ءتىلىن ۇيرەتىپ، قازاق ءتىلدى ورتانى قالىپتاستىرىپ كەلەمىز. 4 ايلىق كۋرستارىمىز بار، اپتاسىنا 3 رەت ساباق وتەدى. بۇگىنگە دەيىن 100-دەن استام ادام كەلدى. بۇل كۋرستارعا كەز كەلگەن ادام تەگىن قاتىسا الادى، - دەدى “باتىل بول” كلۋبىنىڭ نەگىزىن قالاۋشى الەكسەي سكولوزۋبوۆ.