تانىمال پروديۋسەر بايان ماقسات قىزى الماتى كوشەلەرىندەگى جولدىڭ ساپاسى مەن جول جوندەۋ جۇمىستارىنا شاعىم تۇسىرگەن ەدى. قالا اكىمدىگى پروديۋسەردىڭ نارازىلىعىنا جاۋاپ بەردى.
الماتى قالالىق قوعامدىق كەڭىستىكتى دامىتۋ باسقارماسى مالىمەتىنشە، پانفيلوۆ پەن بوگەنباي باتىر كوشەلەرىنىڭ قيىلىسىنداعى ءاليا مولداعۇلوۆا مەن مانشۇك مامەتوۆا اتىنداعى ساياباق قايتا جوندەۋدەن ءوتىپ جاتىر. جوبادا جاياۋ جۇرگىنشىلەر جولى مەن دەمالىس ايماعىن ورنالاستىرۋ، جارىقتاندىرۋ قاراستىرىلعان. جارىقتاندىرۋ تىرەكتەرىن ورناتقاننان كەيىن شامدار قوسىلادى. ساياباقتى اباتتاندىرۋ بيىل قازاندا اياقتالماق، دەپ حابارلايدى aqshamnews.kz.
"ۆيدەوداعى كوشەلەر المالى جانە مەدەۋ اۋداندارىن قامتيدى. ەكى اۋدان اكىمدىگىنەن الىنعان مالىمەتتەر بويىنشا، اۋماقتى تازالاۋ جانە ارىق جۇيەلەرىن تازالاۋ جۇمىستارى كەستەگە سايكەس جۇرگىزىلىپ جاتىر. مەردىگەرلەر مەدەۋ اۋدانىنداعى ەسكەرتۋلەردى نازار اۋداردى، اتاپ ايتقاندا، 1 قىركۇيەكتە تولەبايەۆ پەن بوگەنباي باتىر كوشەلەرىنىڭ قيىلىسىنداعى كارىز قۇدىقتارىنىڭ اينالاسىنا اسفالت توسەۋ جۇمىستارى جۇرگىزىلدى، - دەپ حابارلادى قالا اكىمدىگى وكىلدەرى.
ايتا كەتەيىك، 1 قىركۇيەكتە ونەر يەسى نارازىلىعىن الەۋمەتتىك جەلىدە جاريالاعان ەدى.
"ءقازىر جۇبايىممەن قالانىڭ قاق ورتاسىندا سەرۋەندەپ كەلەمىز. بۇل - بوگەنباي باتىر مەن پانفيلوۆ كوشەلەرىنىڭ قيىلىسى. مىنا قاراڭعىلىقتى قاراڭىزشى، قۇددى ءبىر كولحوز سياقتى. قاراۋسىز قالعان. ال بۇل - نە جارىعى، نە شامى جوق، تۇگى جوق، ونىڭ ۇستىنە، 1،5 جىل بۇرىن جوندەۋ جۇمىسى باستالعان ساياباق. ءبارىن قازىپ تاستاعان. مۇندا تۋريست كوپ، بۇل - قالانىڭ ورتالىعى. مەن سونداي ادەمى قالادا تۇرامىز، اقشا كوپ، كوپ سالىق تولەيمىز. نەگە مىناداي جەردە تۇرامىز؟! جىنىما ءتيىپ بارادى!"- دەيدى بايان الاگوزوۆا ۆيدەودا.
بۇدان باسقا، ونەر يەسى ارىق پەن قوقىس ماسەلەسىنە توقتالدى.
"قاراڭىزدارشى، بۇل - قالانىڭ ورتالىعى. قۇرمەتتى مەدەۋ اۋدانىنىڭ اكىمدىگى، مىناۋ نە؟! ماسەلەن بيىك وكشە اياق كيىم كيگەن ايەل مىنا جەردە جازمىش بولادى. جاۋاپكەرشىلىك جوق. مىناۋ ارىق. بوتەلكە مەن قوقىسقا تولىپ تۇر. بۇل - ءبىزدىڭ ازاماتتىق جاۋاپكەرشىلىك، قۇرمەتتى الماتى تۇرعىندارى، شوشقا دەر ەدىم. تۋعان قالانى قالايشى بىلاي لاستاۋعا بولادى؟! 3 مەتر عانا ءجۇرىپ، بوتەلكەنى قوقىس جاشىگىنە لاقتىرۋعا بولادى عوي! قالاي ۇيالمايسىڭدار!" - دەيدى ول ۆيدەودا.