كىنالىلەر سوت تارتىبىمەن زاڭ اياسىندا جازالانۋى ءتيىس
قازاقستان حالقى اسسامبلەياسى «نارودنىي سوۆەت پەتروپاۆلوۆسك» دەپ اتالاتىن ۇيىمنىڭ اتىنان شىققان ءبىر توپ ادامنىڭ ارانداتۋشىلىق مالىمدەمەسىن قاتاڭ ايىپتادى، دەپ حابارلايدى Almaty-akshamy.kz.
«ءبىز، قازاقستان حالقى اسسامبلەياسىنىڭ وكىلدەرى، قازاقستان رەسپۋبليكاسىنىڭ اۋماقتىق تۇتاستىعىنىڭ مىزعىماستىعىن جانە وعان ىشكى جانە حالىقارالىق زاڭناماممەن كەپىلدىك بەرىلگەنىن مالىمدەيمىز. بۇل ارەكەتتەردى مەملەكەتىمىزدىڭ كونستيتۋسيالىق نەگىزدەرىنە، قاۋىپسىزدىگىنە، بىرلىگى مەن تۇراقتىلىعىنا قارسى باعىتتالعان ەل مۇددەسىنە جاسالعان وپاسىزدىق دەپ باعالايمىز. ءبىز ءبىرتۇتاس حالىق رەتىندە قازاقستاندىق قوعامدا ەشكىمنىڭ ارازدىق پەن سەنىمسىزدىك تاراتۋىنا جول بەرمەيمىز»، - دەلىنگەن ۇيىمنىڭ مالىمدەمەسىندە.
اسسامبلەيا مۇنداي ارانداتۋشىلىقتار اسا جاۋاپسىزدىقتىڭ كورىنىسى جانە قۇزىرلى ورگاندار تاراپىنان قاتاڭ تىيىلۋى كەرەك دەپ ەسەپتەيدى.
كىنالىلەر سوت تارتىبىمەن زاڭ اياسىندا جازالانۋى ءتيىس.
«قازاقستان حالقى اسسامبلەياسى ازاماتتاردى مۇنداي ارەكەتتەرگە بوي الدىرماۋعا جانە مىزعىماس بىرلىگىمىز بەن قوعامدىق كەلىسىمىمىزدىڭ نەگىزى – حالقىمىزعا ءتان دانالىقتى، توزىمدىلىكتى، سەنىم مەن ءوزارا سىيلاستىقتى ساقتاۋعا شاقىرادى. قازاقستان – ءبىزدىڭ ورتاق شاڭىراعىمىز جانە ءبىز قاي جەردە بولساق تا سۇيىكتى وتانىمىزدىڭ وكىلدەرىمىز، ال حالىقارالىق قاۋىمداستىق ءبىزدى ءبىرتۇتاس ءارى قۋاتتى ۇلت رەتىندە تانيدى. ءبىز ءارتۇرلىمىز، ءبىراق بىرلىگىمىز ءارالۋاندىلىقتا. بۇل قاعيدادان ءبىز ەشقاشان اۋىتقىمايمىز»، - دەيدى ۇيىم مۇشەلەرى.
ەسكە سالا كەتەيىك، بۇگىن باس پروكۋراتۋرا سقو-دا سەپاراتيزمدى ناسيحاتتاۋ ىسىنە قاتىستى تەرگەۋ باستالعانىن حابارلاعان بولاتىن.